Esepteý quraldary joq almatylyqtarǵa sýdy qoldaný normalary ózgerdi
ALMATY. KAZINFORM – «Almaty sý» mekemesiniń habarlaýynsha, bul normalar 1989 jyldan beri alǵash ret ózgerdi.
Qujatqa sáıkes, 2025 jyldyń qańtarynan bastap sýdy jáne kárizdi esepteý úshin jańa mólsherlemeler engizildi. Esepteý quraldary ornatylmaǵan úılerdiń turǵyndary úshin tólem myna normalar boıynsha esepteledi:
– Ár tirkelgen adamǵa aıyna 15 tekshe metr sý tutyný qarastyrylǵan. Іs júzindegi tarıf boıynsha tólem 2 217,60 teńge;
– Eger ortalyqtandyrylǵan káriz júıesi bolsa, ár adamǵa qosymsha 687,96 teńge alynady.
– 1989 jyldan beri qoldanylyp kelgen burynǵy normalar aıtarlyqtaı tómen bolatyn: jeke úıler úshin bir adamǵa aıyna 3-6 tekshe metr, páterler úshin – 8,4 tekshe metr. Bul eskirgen normalar tutynýshylardy eseptegish quraldaryn ornatýǵa nemese sýdy únemdeýge yntalandyrmady. Sonyń nátıjesinde qazirgi ýaqytta tek 65% turǵyn úıler sý eseptegishterimen jabdyqtalǵan, – dep atap ótti «Almaty sý» MKK.
Almaty sý mamandarynyń aıtýynsha, buryn jeke úıler ortalyq kommýnıkatsııalarǵa qosylmaǵan bolatyn. Qazir qabyldanǵan sharalardyń arqasynda jeke sektor belsendi túrde qalanyń ınjenerlik júıelerine qosylyp jatyr. Sonymen birge, zamanaýı úılerde birneshe sanıtarlyq toraptardyń, monsha, saýna jáne basseınderdiń bolýyna baılanysty sý tutyný kólemi ósti.
Sýyq sýmen jabdyqtaý jáne káriz qyzmetteri boıynsha qoldanystaǵy tarıftermen, sondaı-aq sý eseptegish quraldary joq tutynýshylarǵa arnalǵan tólemder mólsherimen «Almaty Sý» MKK-nyń resmı saıtynda (almatysu.kz) tanysýǵa bolady.
Buǵan deıin elimizde sýdy únemdep tutynýdyń jańa tarıfi engizilgeni týraly habarlaǵan edik.
Keıin Sý resýrstary jáne ırrıgatsııa mınıstri Nurjan Nurjigitov sýdy paıdalanýdyń jańa tarıfine qatysty pikir bildirdi.