Esepshottaǵy qarjyny buǵattaý sanktsııasyn prokýrorlar beredi

ASTANA. QazAqparat - Sottardyń júktemesin ońtaılandyrýǵa arnalǵan zańda prokýrorlarǵa qosymsha mindetter berý qarastyrylyp otyr. Atalǵan zań aǵymdaǵy jyly 3 aqpanda kúshine enedi, dep xabarlaıdy QazAqparat tilshisi.

Respýblıkalyq jeke sot oryndaýshylary palatasynyń tóraǵasy Ernar Ibraevtyń aıtýynsha, buǵan deıin sanktsııalardyń basym bóligin sottar berip kelgen. Endi, jańa zańnyń aıasynda sottardyń júktemesi azaıady.

«Ózgeristerdi naqty eki topqa bólýge bolady. Birinshiden, jeke menshikke arest salýǵa sot sanktsııasyn alýdyń qajeti joq. Bul degenimiz, sot oryndaýshylary ony sanktsııasyz sala alady. Ekinshiden, sanktsııa berýdiń biraz bóligi prokýratýra organdaryna beriledi. Sonyń ishinde bank esepshottarynda jatqan aqshany buǵattaý, ekinshi deńgeıli bankterden jeke málimetterdi talap etý, quqyqtyq qujattardy alý jáne taǵy basqa sanktsııalar bar. Bylaısha aıtqanda, sanktsııalardyń barlyǵy qalady, biraq ony beretin organ ózgerip otyr», - dedi E.Ibraev Astanada ótken dóńgelek ústelde.

Onyń sózine qaraǵanda, sottyń quzyretinde eki-aq sanktsııa qalady. Birinshisi - Qazaqstan aýmaǵynan shyǵýǵa ýaqytsha shekteý qoıý, ekinshisi - jaýapqa tartylǵan adamdy sot oryndaýshysyna májbúrlep jetkizý.

«Osylaısha, sanktsııalardyń 71 protsenti prokýratýra organdaryna beriledi. Al 14 protsenti sottarda qalady», - dep atap kórsetti E.Ibraev.

Aıta keteıik, búgingi jıynda palata basshysy sot sheshimderiniń oryndalýy nege uzaqqa sozylyp ketetinin túsindirdi.