Esep komıteti ótken jyly 1,7 trln teńgeniń kemshilikterin anyqtady

NUR-SULTAN. QazAqparat – Esep komıtetiniń tóraıymy Natalıa Godýnovanyń tóraǵalyǵymen vedomstvonyń 2021 jylǵy jumysyn qorytyndylaý jáne 2022 jylǵa arnalǵan mindetter jónindegi keńes ótti, dep habarlaıdy QazAqparat.

Keńeste Memleket basshysynyń jaqynda ótken Úkimettiń keńeıtilgen otyrysynda Esep komıtetine bergen tapsyrmalaryn oryndaý máseleleri talqylanǵan.

Komıtettiń málimetinshe, ótken jyly 155 nysanda 32 trln teńgege aýdıt júrgizilgen.

Esep komıteti 1,7 trln teńge bolatyn buzýshylyqtardy anyqtady, onyń ishinde: qarjylyq buzýshylyqtar - 399 mlrd teńgege; tıimsiz josparlaý - 255 mlrd teńgege jáne tıimsiz paıdalanylǵan bıýdjet qarajaty, memleket aktıvteri - 1 trln teńgeden asady.

Onyń 29,1 mlrd teńgesi qalpyna keltirilip, memlekettik bıýdjetke quıylǵan.

Úkimet pen memlekettik organdarǵa 81 usynym men 511 tapsyrma berilgen. 199 laýazymdy tulǵa tártiptik jaýapkershilikke tartyldy,onyń ishinde 34 joǵary býyn basshysy bar.

75 jeke jáne zańdy tulǵa ákimshilik jaýapkershilikke tartylyp, 56 aýdıt materıaldary quqyq qorǵaý organdaryna jiberilgen.