Esep komıteti Densaýlyq mınıstrligindegi qarjylyq bylyqtardy atady

Densaýlyq saqtaý salasyndaǵy memlekettik saıasatty iske asyrý máselelerinde birqatar júıeli problemalardyń saqtalyp otyrǵany anyqtaldy. Densaýlyq saqtaýdyń baǵdarlamalyq qujattaryn iske asyrýda júıeliliktiń bolmaýy, dárilik zattardy jáne medıtsınalyq tehnıkany satyp alýǵa jumsalatyn shyǵyndardy joparlaý sapasy deńgeıiniń tómendigi atap ótildi. Jekelegen densaýlyq saqtaý uıymdary men jergilikti atqarýshy organdar bıýdjettik baǵdarlamalar nátıjeleriniń kórsetkishterine qol jetkizbeý, qarjylyq tártipti saqtamaý faktilerine jol bergen.
Statsıonarlyq kómektiń tósek qoryn tıimsiz paıdalaný faktileri anyqtaldy. Máselen, 2016 jyl ishinde Mańǵystaý oblysynda travmatologııalyq beıindegi jáne Almaty oblysynda endokrınologııalyq beıindegi sany 41 paıyzǵa jetken paıdalanylmaıtyn aýrýhana tósekterin qaıta beıindeý boıynsha sharalar qabyldanbaǵan. Densaýlyq saqtaý mınıstrligimen birlesip ótkizilgen medıtsınalyq tehnıkalardy satyp alýdy taldaý jabyqtardy satyp alý tártibin reglamentteıtin zańnamada eleýli olqylyqtardyń bar ekenin kórsetti», - delingen habarlamada.
Máselen, jergilikti atqarýshy organdardyń densaýlyq saqtaý uıymdary úshin medıtsınalyq tehnıkanyń qundyq jáne tehnıkalyq sıpattamalaryna mindetti saraptama júrgizý týraly talap normatıvtik quqyqtyq aktilerde joq. Bul óńirlerde mamandandyrylǵan jabdyqty 0,5 mlrd teńgege joǵary qoıylǵan baǵamen, sondaı-aq somasy 8 mlrd astam teńgege kepildikti servıstik qyzmet kórsetýge qoıylatyn talaptardy saqtamaı satyp alýǵa ákep soqtyrǵan. Densaýlyq saqtaý mekemeleriniń materıaldyq-tehnıkalyq jaraqtandyrylýyna tıisti túrde monıtorıng júrgizilmeýi sebebinen Mınıstrliktiń alty vedomstvolyq baǵynysty uıymynda jalpy quny 0,7 mlrd teńge bolatyn, jumys istemeı turǵan 13 birlik jabdyq anyqtaldy. Jabdyqtardyń jumys istemeýiniń negizgi sebepteri tıisti mamandardyń bolmaýy jáne jınaqtaýysh bólshekterdiń jetispeýshiligi bolyp tabylady.
«Dárilik zattardy satyp alýǵa jumsalatyn shyǵyndardy josparlaýdyń qoldanystaǵy tetiginiń kemshilikteri anyqtaldy, bul 2016 jyldan somasy 24 mlrd teńgeni quraıtyn qaldyq bola tura, 2017 jylǵa arnalǵan bıýdjetti qalyptastyrýǵa ákep soqtyrǵan. Bul rette bir óńirlerde birqatar medıtsınalyq preparattardyń jetispeýi, al basqa óńirlerde olardyń kóptigi baıqalady. Ulttyq skrınıngtik baǵdarlamany iske asyrýdyń júıesizdigi el halqynyń qýyqasty bezi, baýyr, óńesh jáne asqazannyń onkologııalyq aýrýlaryn erte anyqtaý turǵysynan profılaktıkalyq is-sharalarmen tolyq qamtylmaýyna alyp keldi. Obyrdyń kórsetilgen túrlerinen ólim-jitimniń ulǵaıý úrdisi bola tura, Ońtústik Qazaqstan, Aqmola, Almaty, Jambyl jáne Mańǵystaý oblystarynda tıisti skrınıngtik zertteýler júrgizilmeýde. Aıtalyq, Almaty oblysynda 2016 jyly qýyqasty bezi obyrynan bolatyn ólim-jitim 2014 jylmen salystyrǵanda 43, Jambyl oblysynda 53 paıyzǵa ósip otyr», - dep atap ótedi Esep komıteti.
Halyqqa sanıtarııalyq avıatsııa nysanynda medıtsınalyq jedel kómek kórsetý júıesinde de eleýli kemshilikter anyqtaldy. Atap aıtqanda, áýe kemeleriniń jedel ótinimder boıynsha ushýda paıdalanýǵa daıyndyǵyn qamtamasyz etpeıtin olardyń nashar tehnıkalyq jaı-kúıi men tıisinshe kútip-ustalmaýy faktileri Esep komıtetiniń aldyńǵy aýdıtorlyq is-sharalarynyń qorytyndysynda da birneshe ret atalyp ótken.
«Aıtalyq, sanıtarııalyq avıatsııa qyzmetin kórsetetin 12 kompanııanyń ishinen segiziniń avıatsııalyq parkin paıdalaný merzimi 30-dan 40 jylǵa deıin, jekelegen áýe kemeleri qolaısyz meteojaǵdaılarǵa jáne táýliktiń túngi ýaqytynda ushýǵa tehnıkalyq beıimdelmegen, bul 2016 jyly 93 ushýdy boldyrmaýǵa alyp kelgen. Memlekettik aýdıt qorytyndylary boıynsha somasy 31,2 mlrd teńgege qarjylyq buzýshylyqtar, 31,4 mlrd teńgege 101 rásimdik buzýshylyq, 46,8 mlrd teńgege bıýdjet qarajatyn tıimsiz josparlaý jáne paıdalaný faktileri anyqtaldy. Memlekettik aýdıt barysynda qarjylyq buzýshylyqtar somasy tolyq kólemde qalpyna keltirildi jáne óteldi, 3 zańdy tulǵa jáne 14 laýazymdy adam ákimshilik jaýaptylyqqa tartyldy. Esep komıteti otyrysynyń qorytyndysy boıynsha Úkimetke tıisti usynymdar berildi. Densaýlyq saqtaý mınıstrligine anyqtalǵan buzýshylyqtardy joıý boıynsha sharalar qabyldaý, bıýdjet jáne ózge de zańnama talaptarynyń saqtalýyn qamtamasyz etpegen laýazymdy adamdardyń jaýaptylyǵyn qaraý tapsyryldy, sondaı-aq basqa da birqatar tapsyrmalar berildi. Aýdıttiń jekelegen materıaldary quqyq qorǵaý organdaryna jáne ákimshilik quqyq buzýshylyqtar týraly isterdi qaraýǵa ýákiletti organdarǵa protsestik sheshimder qabyldaý úshin jiberildi», - delingen taratylǵan aqparatta.