Esbol Sultanov: ýnıversıadada shákirtterim senimdi aqtady
ASTANA. KAZINFORM — Taekvondodan Qazaqstan ulttyq quramasy XXXII Dúnıejúzilik Ýnıversıada oıyndaryn 1 altyn, 7 qola júldemen aıaqtady. Kazinform tilshisi osyǵan oraı taekvondodan Qazaqstan ulttyq quramasynyń bas bapkeri Esbol Sultanovty áńgimege tartqan edi.
— Ýnıversıadaǵa daıyndyqqa kóńil bóldik. Oqý-jattyǵý jıyny Almaty oblysynda ótti. Onda sportshylarmen jeke bapkerlerimen keldi. Aldyn ala josparymyz boıynsha keminde úsh medalǵa qol jetkizýdi maqsat ettik. Shákirtterim namysqa tyrysty. Qorjynymyzǵa jeti medal tústi.
Qurama sapynan Samırhon Ababakırov altyn alsa, Damır Shúlenov, Tamırlan Tileýles, Batyrhan Tóleýǵalı, Beıbarys Kablan jáne Nodıra Ahmedova qola júldeger atandy. Sondaı-aq elimizdiń taekvondodan aralas quramasy Ýnıversıada oıyndarynyń qola júldegeri boldy. Qurama sapynda Beıbarys Qabylan, Samırhon Ababakırov, Aıdana Súndetbaı jáne Nazym Mahmýdova synǵa tústi.
Ýnıversıada joǵary deńgeıdegi sporttyq shara ekeni belgili. Soǵan qaramastan olar jarys barysynda jınaqy qımyl kórsetti. Júldeli oryndardan kórindi.
— Alda qandaı jarystar bar? Oǵan daıyndyq barysy qalaı júrgiziledi?
— Jaqynda elordamyzda Astanada halyqaralyq jarys ótedi. Oǵan jıyrmadan astam memleketten sportshylar keledi dep kútilýde. Bul jarysta da joǵary deńgeıde sheberlik kórsetemiz degen oıdamyn. Al tamyz aıynyń aıaq shenine taman Ońtústik Koreıada ekinshi Gran-Prı chelendji bar. Oǵan da baryp qatysyp qaıtýdy josparlap otyrmyz. Qazan aıynda jyldyń basty básekesi — álem chempıonaty ótedi.
— Qazir álemde qandaı elder taekvondonyń damýy jóninen alda keledi? Olardan ne úırenýge bolady?
— Dúnıejúzinde taekvondodan Ońtústik Koreıa, Iran, Ózbekstan elderi aldyńǵy lekten kórinip júr. Biz bıyl halyqaralyq deńgeıde oqý-jattyǵý jıynyn ótkizdik. Ony aldymen Ózbekstannan bastadyq. Oǵan onshaqty memleketten sportshylar keldi. Odan keıingi saparymyz Iranda jalǵasty.
— Ózińizden shetelde qyzmet atqaryp qaıtqanyńyzdy bilemiz. Sondyqtan sportshylardy jarysqa daıyndaý barysynda qandaı jańa ádis-tásilge kóńil bólesiz?
— Álemde taekvondo jyldam ózgerip keledi. Budan buryn Olımpıadaǵa sportshylardy daıyndaýǵa baılanysty alǵan tájirıbemdi endigi kezekte Qazaqstan quramasyna barynsha paıdalanyp jatyrmyn. Oqý-jattyǵýǵa baılanysty jańa úlgisi men júıesin qoıyp, myqty rejımge kóńil bóldik. Sportshylar oǵan beıimdelip jatyr. Ýnıversıadaǵa jetistigimizdi sol jańa baǵdarlamanyń jetistigi dep esepteımiz.
— Alda 2028 jylǵy Los-Andjeles Olımpıada oıyndary jaqyndap keledi. Oǵan daıyndyq qalaı júrgiziledi? Ulttyq quramany irikteýde qandaı talaptar saqtalatyn bolady?
— Qaı jarysta da sportshylardyń pısıhologııalyq turǵydan daıyn bolýyna nazar aýdarylady. Sol kedergiden ótý úshin kóptegen jarysqa qatysýǵa kóńil bólip otyrmyz. Árıne, jarysqa qatysqanda sportshy kóbirek tájirıbe alady. Psıhologııalyq kedergiden tez ótedi dep oılaımyn.
— Jankúıer qaýym sizdiń shetelde qyzmet atqarǵanyńyzdy biledi. Degenmen ózińiz jaıly aqparat az.
— Men bapkerlik qyzmetimdi 2008 jyly bastaǵan edim. Shákirtterimniń arasynda Qazaqstan, Azııa jáne álem chempıonattarynda júldeli oryndardan kóringender bar. Al jańa qyzmeti deıin Týnıs elinde olımpıadalyq quramasynyń bas bapkeri boldym. Endigi kezekte óz elimniń týy men sportyn kóterýge múmkindik alyp jatyrmyn. Aldaǵy ýaqytta shákirtterimniń arasynan álem jáne Olımpıadada top jarǵan sportshylar shyǵatynyna senim artamyn.
— Áńgimeńizge raqmet.