Ertis ózeninde 24 sáýirden kemeler júze bastaıdy
PAVLODAR. KAZINFORM - Qazirgi ýaqytta Pavlodar oblysy boıynsha kóliktik baqylaý ınspektsııasynyń esebinde 102 keme tirkelgen.
Ertis ózeninde 24 sáýirden navıgatsııalyq kezeń ashylady. Bul – júk jáne jolaýshylar tasıtyn sý kólikteriniń elimizdegi eń uzyn sý arterııasynda júzýine resmı ruqsat beriledi degen sóz. Navıgatsııalyq kezeń ózenniń joǵarǵy jaǵynda - Maıtúbek – Pavlodar qalasy baǵytynda jáne tómengi bóligi - Pavlodar – Tómengi Alekseevskıı (RF shekarasy) baǵytynda jumys isteıdi.
- Ózen ústinde júk jáne jolaýshylar tasymalyn uıymdastyratyn kemeler bizdiń ınspektsııada resmı tirkelýi kerek. Qazirgi ýaqytta bizdiń uıymnyń esebinde 102 sý kóligi tirkelgen. Onyń 49-y ózdiginen júretin kólikter bolsa, ózgesi ózdiginen júrmeıtin, ıaǵnı barjalar. Bulardyń ishinde 2 teplohod qana jolaýshylar úshin jabdyqtalǵan, anyǵyn aıtqanda ózen ústindegi serýenge arnalǵan. Ózgesi júk tasymalynda paıdalanylady. Syıymdylyǵy 1000 tonnalyq barjalar Pavlodar portynan shyǵyp Reseıdiń Omby qalasyna júk tasıdy. Negizgi aparatyn taýarlary – ózen qumy men qıyrshyq tas. Al qaıtarda kesilgen aǵash túrlerin jetkizedi. Barjalar Ombyǵa baǵyt alǵanda aǵys boıymen júzetindikten 5 táýlikteı ýaqytyn jumsaıdy. Al Pavlodarǵa oralǵanda aǵysqa qarsy bolǵandyqtan uzaqtaý júzip keledi, - dep túsindirdi Pavlodar oblysy boıynsha kóliktik baqylaý ınspektsııasynyń bas mamany Ernur Eslaý.
Sýda júzetin kólikterdiń salmaǵy 200 kılogramnan jáne qozǵaltqyshynyń kólemi 10 attyń kúshinen assa, ıesi tirkeýge qoıýǵa mindetti. Úlken kemelerden bólek, tirkeýge qoıylǵan 1540 shaǵyn kólemdi keme bar. Іshki sý joldary arqyly júk jáne jolaýshylar tasymaldaıtyn ózen kólikteriniń qyzmetkerleri ýaqyt saıyn biliktiligi men deńgeıin arttyryp otyrýy kerek. Mysaly, keme kapıtany bes jylda bir márte attestattaýdan ótedi. Al onyń kómekshileri men mehanıkterge jáne t.b. mamandarǵa óz deńgeıin arttyrý úshin dıplomdaý júıesi qarastyrylǵan.
Oblysta keme kapıtandarynyń jetispeýshiligi máselesi bar. Semeıde kapıtandardy oqytyp shyǵarǵanymen, olardyń bilimi orta kásibı dep esepteledi. Sondyqtan el azamattary tolyqqandy kapıtan bolý úshin Reseıde oqyp kelýge májbúr. Inspektorlar qazirgi ýaqytta sý kólikteriniń tıisti qujattaryn, ondaǵy kapıtandar men kómekshilerdiń, mehanıkterdiń biliktilikteri týraly dıplom-sertıfıkattaryn tekserip jatyr.
- Óńirdegi sý joldarynyń jaǵdaıy «Qazaqstan sý joldary» uıymynyń jergilikti fılıalynyń mamandary arqyly tekserilip jatyr. Atalǵan uıym kemelerge arnaıy sý joldary kórsetilgen kartalar beredi. Júk nemese jolaýshylar tasyǵan ýaqytta kez kelgen keme sol baǵytty ustanyp, barlyq belgilerge baǵynýy kerek. Mysaly, Pavlodar qalasynyń mańynda zákir tastaýǵa bolmaıtyn oryndar bar. Al keı jerlerdegi sý joldarynyń eni tarlaý keledi, - dep qosty ınspektsııa ókili.
Kemeler qaırańdap qalmaýy úshin bekitilgen erejelerdi eskerip, sý joldarynyń kartasyn negizge alady. Al belgilerdiń talapqa saı bolýyna «Qazaqstan sý joldary» jaýap beredi. Inspektsııa óz tarapynan belgilerdiń jaǵdaıy men durys ornalasýyn tekseredi. Kemelerdi de jıi tekserip turady. Ásirese, jaz ýaqytynda quqyq qorǵaý organdarynyń qyzmetkerleri reıd uıymdastyrady.
«Shaǵyn kólemdi sý kólikterindegi adamdar kóbine qutqarý jeletkesin kımeıdi. Al úlken kemeler men barjalarda arnaıy jýrnaldardy toltyrý, attestattaýdan ýaqtyly ótpeý sııaqty júıeli kemshilikter kezdesip jatady. Kemshilikke jol bergen tulǵalarǵa aıyppul salynady. Keıde reseılik kemeler men barjalar Pavlodardaǵy portqa kelip, júk túsiredi. Olar shekaradaǵy bekette jáne portta tekserýden ótedi. Buǵan qosa sońǵy jyldary Semeıden bir barja kelip júr»,- deıdi E.Eslaý.
Atap óterligi, Pavlodar qalasyndaǵy jalǵyz keme jóndeý zaýytyn áldebir kásipker satyp alyp, kásiporyndy keńeıtýdi josparlap otyr.
Buǵan deıin Ertis ózenindegi sý kólikteri tehnıkalyq baıqaýdan qalaı ótetini týraly jazǵanbyz.