Ertis ormanynda janyp ketken orman beldeýleri qalpyna keltirilip jatyr
PAVLODAR. KAZINFORM — Rezervatta ormandy qalpyna keltirýdiń kúzgi jumystary bastaldy.
Eki jyldyq qaraǵaı kóshetteri janyp ketken aǵashtardyń ornyna otyrǵyzylyp jatyr.
«Ertis ormany» memlekettik tabıǵı rezervaty óz aýmaǵynda ormandy qalpyna keltirýdiń kúzgi naýqany bastalǵanyn málim etti.
— Bıyl kúzgi kezeńde 600 gektardan astam aýmaqta jasyl jelek qalpyna keltiriledi. Bul tabıǵattyń tepe-teńdigin saqtaý men ekojúıeni nyǵaıtýǵa baǵyttalǵan aýqymdy jumys. Qazirgi tańda Besqaraǵaı orman tuqymbaǵynan eki jyldyq kádimgi qaraǵaı kóshetteri qazylyp alynyp, daıyndalǵan telimderge kóshirilip jatyr, — dep habarlady rezervattyń baspasóz qyzmetinen.
Bul agrotehnıkalyq kezeń jalqaraǵaı ormandaryn qaıta jańǵyrtý protsesiniń eń jaýapty ári mańyzdy bóligi sanalady. Kóshetterdiń sapasy, tamyr júıesiniń beriktigi jáne otyrǵyzý ádisteriniń durystyǵy aldaǵy ormannyń taǵdyryn aıqyndaıdy.
Buǵan deıin «Ertis ormany» rezervatynda 12 mln-nan astam qaraǵaı kósheti otyrǵyzylatyny týraly jazǵanbyz.
Mamandar sońǵy bes jylda Ertis ormanynyń 2 myń tekshe metri otalyp ketkenin aıtady.