«Ertis ormany» bulan men eliktiń qysqy azyǵyn qamdap jatyr
PAVLODAR. KAZINFORM - «Ertis ormanynyń» qyzmetkerleri orman janýarlary úshin qysqy azyq qoryn qamdap jatyr. Rezervat aýmaǵynda qystyń kúni 61 arnaıy azyqtandyrý alańy jumys isteıdi.
Alda qaqaǵan qys kele jatyr. Jer betin aq mamyq kórpe japqan mezgilde de «Ertis ormany» memlekettik orman tabıǵı rezervatynda qaýyrt jumys tynshymaıdy. Qys qaharyna minip, omby qar túskende Shaldaı jáne Besqaraǵaı fılıaldaryndaǵy qyzmetkerler janýarlar álemin brakonerlerden qorǵaý, jabaıy ańdardy tirkeý men olardyń kóship-qoný monıtorıngin júrgizedi. Bul ýaqytta tuıaqty janýarlar úshin qar astynan azyq taýyp jeý qıynǵa soǵatyny málim. Osyny eskergen jergilikti ańshylyqtanýshy mamandar orman arasyn mekendeıtin bulan, elik sııaqty sútqorektilerge azyq oryndaryn uıymdastyrady.
Ormanshylar tilinde bul bıotehnıkalyq is-shara dep atalady. Rezervattyń ańshylyqtanýshysy Qaıyrjan Ádilbaevtiń aıtýynsha, ormandy mekendegen janýarlarǵa qysqy azyq qory júıeli túrde ázirlenedi. Ańshylyqtanýshylar jabaıy janýarlar úshin bıyl 25 tonna shóp, 3000 dana butaq býmalaryn, 600 kılogramm tuz daıyndap jatyr.
— Qysqy kezeńde janýarlarǵa azyq jetkizý — rezervattaǵy mańyzdy ekologııalyq is-sharalardyń biri. Bul jumys arnaıy josparǵa sáıkes, qatań tártippen jáne júıeli túrde atqarylady. Rezervat aýmaǵynda 61 arnaıy azyqtandyrý alańy bar. Qysqy ýaqytta shóp, tuz, azyqtyq butaq býmalary belgilengen oryndarǵa jetkiziledi. Ańshylyqtanýshylar men memlekettik ınspektorlar alańdardy únemi baqylap otyrady. Eger azyq kólemi azaısa, der kezinde qosymsha jetkiziledi, — deıdi ol.
Qozǵalys qıyndaǵan jaǵdaıda janýarlar júretin soqpaq joldar anyqtalyp, sol mańdaǵy aǵashtarǵa azyq ilinedi. Bul tásil, ásirese elik, buǵy, qoıan sekildi tuıaqty ańdar úshin tıimdi.
Atap óterligi, qazirgi ýaqytta «Ertis ormany» aýmaǵynda sútqorektilerdiń 21 túri, qustyń 90, baýyrymen jorǵalaýshylardyń 3 jáne 32 jándik túri tirkelgen. Munda Qyzyl kitapqa engen orman sýsary mekendeıdi. Sońǵy sanaq qorytyndysy orman sýsarynyń 101 daraǵy tirkelgen.
Eske sala keteıik, «Ertis ormanynda» sileýsinniń tólderi kózge tústi.