Ertis-Baıan óńiriniń fermerleri bıyl 541 jańa tehnıka satyp alady
PAVLODAR. KAZINFORM - Olardyń deni traktorlar men kombaındar, aspaly jáne tirkemeli tehnıka túrleri. Bıyl egis jumystaryna oblysta 1234 sharýashylyq qatysady dep kútilip otyr.
Pavlodar oblysy aýyl sharýashylyǵy basqarmasynyń dereginshe, óńirdegi boljamdy egis alqaptarynyń kólemi — 1 mln 657,3 myń gektar. Maıly jáne jemshóp daqyldarynyń egistigin keńeıtý esebinen ótken jylǵy deńgeıden 20,3 myń gektarǵa kóp.
Buǵan deıin oblysta barlyǵy 49 358 birlik aýyl sharýashylyǵy tehnıkasy men túrli jabdyqtar bar bolsa, onyń 39 327-si nemese 79,7% paıyzy tozyp ketkeni týraly jazǵanbyz
Basqarmanyń bas mamany Zámzagúl Búrkitbaevanyń sózinshe, bıyl jergilikti fermerler jańadan 541 tehnıka satyp alýǵa ótinim bergen. Bul qoldanystaǵy eski tehnıkalardy shamamen 1,3 paıyzǵa jańartýǵa múmkindik beredi.
«Kóktemgi dala dumystaryna shamamen 1234 sharýashylyq qurylymy qatysady dep boljanyp otyr. Ósimdik sharýashylyǵyn qarjylaı qoldaýǵa bıýdjetten 5,9 mlrd teńge bólindi. Aýyl sharýashylyǵy taýaryn óndirýshilerge qaziridń ózinde 2,4 mlrd teńge tólenip qoıdy.
Sýbsıdııalar tuqym sharýashylyǵy damytýǵa, mıneraldy tyńaıtqyshtar men pestıtsıdterdiń qunyn jáne sharýalarǵa sý jetkizý jónindegi qyzmetterdiń qunyn sýbsıdııalaýǵa baǵyttalǵan. Budan bólek, aýyl sharýashylyǵyn sýbsıdııalaýdyń barlyq baǵdarlamalary boıynsha 13,2 mlrd teńge tólendi», — deıdi ol.
Dıqandardy sapaly tuqymmen qamtamasyz etý boıynsha jumystar jalǵasyp jatyr. Qazirgi sátte dándi jáne dándi-burshaqty daqyldar boıynsha tuqymdardyń jalpy jetispeýshiligi 7,4 myń tonnany quraıdy. Mamannyń aıtýynsha, ol basqa kózderden tuqym satyp alý esebinen jabylatyn bolady. Fermerlerge jalpy kólemi 174,4 myń tonna tuqym qajet.
«Kóktemgi dala jumystaryn júrgizýge Pavlodar oblysyna 25,7 myń tonna arzandatylǵan dızel otyny bólindi. Komıssııa sheshiminen „LF TRADE“ jáne „TK Parnas“ seriktestikteri jetkizýshi operatorlar retinde tańdaldy. Operatorlyq qyzmetterdi eskere otyryp, arzandatylǵan dızel otynynyń 1 tonnasynyń quny 282 myń teńgeni nemese lıtrine 237 teńgeni qurady. Bul ónimniń naryqtyq qunynan 58 teńgege arzan (naryqtyq quny 295 teńge/lıtr). Qazir 13,6 myń tonnaǵa sharttar jasalyp, 5,8 myń tonnasy aqsha tólendi. 4,1 myń tonna suıyq otyn tasylyp úlgerildi. Jumystar kestege sáıkes júrgizilip jatyr», — dep naqtylady basqarmadan.
