Ertis-Baıan óńirinde JOO-larda qansha stýdent bilim alyp jatyr

PAVLODAR. KAZINFORM - Óńirdegi joǵary oqý oryndarynda bilim alyp jatqandardyń úlesi 3,9 %-ǵa artqany baıqalyp otyr. Bıyl jergilikti oqý uıymdarynda jańadan 6 myńnan astam stýdent qabyldanǵan.

Pavlodar oblysynda úsh ýnıversıtet pen bir ınstıtýt bar. 

Óńirlik statıstıka departamentiniń málimetinshe, atalǵan oqý oryndarynda qazirgi ýaqytta 15 656 adam bilim alyp jatyr. Bilim alýshylar sany byltyrǵy oqý jylymen salystyrǵanda 3,9 %-ǵa ósken. 

- Bilim alýshylardyń qataryndaǵy názik jandardyń úlesi – 49,1%. Barlyq stýdentter kúndizgi oqý túrin tańdaǵan. Bıyl JOO-lar 6075 adamdy jańadan oqýǵa qabyldaǵan. Talapkerlerdiń 47,8 %-y orta oqý ornynan keıin qujat tapsyrǵandar bolsa, 42 %-y kolledj bitirgender, - dep habarlady oblystyq statıstıka departamentinen. 

Bilim alýshylardyń 40,4 %-y mamandyqtaryn memlekettik tilde meńgerip jatyr. JOO-larda shet memleketterden kelgen 249 adam oqıdy.

Oqý uıymdarynda stýdentterge 896 oqytýshy sabaq beredi. Olardyń arasynda 47 ǵylym doktory, 298 ǵylym kandıdaty, 53 professor, 218 dotsent bar. Fılosofııa doktory (PhD) ǵylymı dárejesin 157 oqytýshy, magıstr akademııalyq dárejesin 342 adam ıelengen.

Eske sala keteıik, muǵalim júktemesin azaıtýǵa baǵyttalǵan Ulttyq bilim berý platformasy iske qosylady.