Ertis-Baıan óńirinde qansha qarııa qarttar úıin panalap otyr
PAVLODAR. KAZINFORM — Oblysta memlekettik arnaýly áleýmettik qyzmetter kórsetý jónindegi 2 ortalyq jáne kútimge muqtaj egde jastaǵy adamdarǵa arnalǵan 5 jeke menshik pansıonat jumys isteıdi.
Óńirlik jumyspen qamtýdy úılestirý jáne áleýmettik baǵdarlamalar basqarmasynyń dereginshe, qarttar men múgedektigi bar adamdarǵa arnalǵan statsıonar jaǵdaıyndaǵy memlekettik ortalyq sany — ekeý. Olar — «Pavlodar oblysynyń jalpy úlgidegi qarttar men múgedektigi bar adamdarǵa arnalǵan arnaýly áleýmettik qyzmet kórsetý ortalyǵy» KMM (268 tósek-oryn) jáne «Qarttar men múgedektigi bar adamdarǵa arnalǵan jalpy úlgidegi Aqsý arnaýly áleýmettik qyzmetter kórsetý ortalyǵy» KMM (241).
— Qarttar men múgedektigi bar adamdarǵa arnalǵan arnaýly áleýmettik qyzmet kórsetý ortalyqtaryn 497 adam panalap otyr. Olardyń 323-i er, ózgesi áıel adamdar. Pavlodar qalasynda ornalasqan qarttar úıine 4 adam kezekte tur. Al Aqsýdaǵy mekemede kerisinshe 12 oryn bos tur. Sondyqtan óńir boıynsha qarttar úılerine tapshylyq baıqalmaıdy, — dep habarlady basqarma basshysynyń orynbasary Álııa Rahymova Kazinform tilshisine.
Áleýmettik qyzmet kórsetý júıesin transformatsııalaý sheńberinde byltyrdan bastap Qazaqstanda arnaýly áleýmettik qyzmetter kórsetý salasynda arnaıy áleýmettik qyzmetter kórsetetin sýbektilerdi lıtsenzııalaý, jan basyna shaqqandaǵy qarjylandyrýǵa kóshý sııaqty eleýli ózgerister engizilgen. Áleýmettik kodekske sáıkes, arnaýly áleýmettik qyzmet kórsetetin sýbektiler — arnaýly áleýmettik qyzmet kórsetýge lıtsenzııa negizinde arnaýly áleýmettik qyzmet kórsetý boıynsha memlekettik jáne memlekettik emes sektorlarda jumys isteıtin jeke jáne (nemese) zańdy tulǵalar.
— Pavlodar oblysy boıynsha búgingi kúni statsıonar jaǵdaıynda arnaýly áleýmettik qyzmetter kórsetetin lıtsenzııalanǵan jeke sýbektiler joq. Biraq aýmaǵymyzda turaqty kútimge muqtaj egde jastaǵy adamdarǵa turmystyq kútim kórsetý jónindegi qyzmetti júzege asyratyn 5 jeke menshik pansıonat jumys isteıdi. Bul uıymdardyń qyzmeti halyqty áleýmettik qorǵaý júıesin retteý jáne vedomstvolyq baqylaý salasynan tys ornalasqan. Sebebi ondaǵy kútilip jatqan qarııalardyń eńbekke qabiletti balalary bar. Sondaı-aq atalǵan pansıonattardyń arnaýly áleýmettik qyzmetter kórsetýge lıtsenzııasy joq jáne arnaýly áleýmettik qyzmetter keshenin usynbaıtyndyqtan áleýmettik qyzmetterdi jetkizýshiler tizilimine engizilmegen. Soǵan oraı olarǵa bıýdjetten qarjy bólinbeıdi, — dep qosty basqarma ókili.
Budan bólek aımaqta úıde kútim jasaý jaǵdaıyndaǵy qyzmetti 18 uıym, onyń ishinde 13 memlekettik, 5 memlekettik emes sýbekti júzege asyryp otyr.
Byltyr prokýrorlar Aqsý qalasyndaǵy pansıonatta qart adamdardy syrt kıimsiz dalada ustap, azaptaý derekterin anyqtaǵan edi.
Jumyspen qamtýdy úılestirý jáne áleýmettik baǵdarlamalar basqarmasynyń aqparynsha, qazir atalǵan ortalyq jumys istemeıdi. Sot kináli tulǵalardy anyqtap, qylmystyq jaýapkershilikke tartqan.
2026 jylǵa qarttar úılerine bıýdjetten 1 mlrd 667,2 mln teńge bólingen.
Eske sala keteıik, Pavlodardaǵy qarttar úıinde turatyn Saǵadat Jumabaev qajylyqqa dep jınap kelgen 3,6 mln teńge qarajatyn múgedek balalarǵa berdi.