Ertis-Baıan óńirinde 210 myń gektar jer zańsyz berilgen – prokýratýra
PAVLODAR. KAZINFORM — Oblysta 168 jer ýchaskesi kiris organdaryna tirkelmeı, saldarynan memleket bıýdjetine 20 mln teńgeden astam salyq túspeı qalǵan. Jer qatynastary salasyndaǵy bylyqtarǵa qatysy bar 20 laýazymdy tulǵa tártiptik jazaǵa tartyldy.
Pavlodar oblysy prokýratýrasynyń alqasy 2022-2023 jyldar boıynsha jer qatynastary salasyndaǵy tekserýlerdiń nátıjelerin qarastyrdy. Prokýrorlyq tekserýler zań buzýshylyqtardyń júıeli túrde jasalatynyn kórsetip, keıbir jaǵdaılarda sybaılas jemqorlyq táýekelderi anyqtaldy.
– Atap aıtqanda, jerdi maqsaty boıynsha paıdalanbaý, ýchaskelerdi óz betinshe basyp alý, jaldaý sharttaryn negizsiz uzartý, alypsatarlyq, jerdi qaıtarý kórsetkishterin asyra baǵalaý, qalalardaǵy bas josparlar men aýdandardaǵy jer-sharýashylyq qurylǵylarynyń jobalarymen qosa, qala qurylysy qujattaryn saqtamaý faktileri bolǵan. Pavlodar oblysy jer resýrstaryn basqarý departamentiniń jumysy tıimsiz dep tanyldy. Máselen, tıisti talaptardyń qanaǵattaný deńgeıi nebári 30%-dy qurasa, 170-ke jýyq nusqamanyń oryndalýy baqylanbaǵan. Sondaı-aq, 168 jer ýchaskesi boıynsha materıaldar memlekettik kiris organdaryna jiberilmegendikten, bıýdjetke 20 mıllıon teńgeden astam salyq túspegen, – dep habarlady oblystyq prokýratýradan.
Prokýrorlar qyzmet babyn asyra paıdalanǵany úshin laýazymdy tulǵaǵa qatysty qylmystyq isti tirkep, sotqa jiberdi. Buǵan qosa 20 laýazymdy tulǵa tártiptik jazaǵa tartyldy. Óńir boıynsha jalpy aýmaǵy 210 myń gektar jerdi berý týraly konkýrstardyń nátıjesi, sondaı-aq úsh egjeı-tegjeıli josparlaý jobasy joıyldy.
