Erteń Djeı Lo kontsertine bıletter satyla bastaıdy

ASTANA. KAZINFORM — Amerıkalyq aktrısa jáne ánshi Djennıfer Lopestiń Astanada ótetin kontsertinen bıletter erteń satylymǵa shyǵady. Bul týraly «Astana Kontsert» kompanııasynyń prodıýseri Málik Hasenov aıtty.

— Sońǵy úsh kúnde óte jıi qoıylǵan saýaldardyń biri bıletter satylymynyń qashan bastalatyndyǵyna qatysty boldy. Resmı bıletter satylymynyń bastalýy eksklıýzıv túrde FreedomTicketon bılet operatorynda júzege asyrylatynyn málimdemekpin. Ol 11 sáýir kúni saǵat 11:00–de bastalady. Biz bılet satyp alǵysy keletin kórermenderdiń legi qalyń bolady dep kútip otyrmyz. Bıletterdi jappaı satyp alý, alypsatarlyq bolmaýy úshin álemdik tájirıbe negizindegi júıe qoldanylady. Bastapqyda vaýcher satylady. Al biregeı QR kodtyń ózi kontsertke úsh kún qalǵan kezde beriledi, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, bul balama alańdarda bıletterdiń 2, 3 ese qymbatqa satylymǵa shyǵarylmaýy úshin jasalady. Bir adam tek 4 bılet qana satyp ala alady.

— Bul bıletke qatysty alaıaqtyqty boldyrmaýǵa múmkindik beredi dep oılaımyz, — dedi Málik Hasenov.

Buǵan deıin 1 tamyzda «Astana Arena» stadıonynda álemge áıgili ánshi Djennıfer Lopestiń kontserti ótetindigin jazǵan edik. 

Elordadaǵy kontsert álemdik juldyzdyń Up All Night týrnesi aıasynda ótpek. Álemdik týr 1 shildede bastalyp, 3 tamyzǵa deıin jalǵasady. Ol álemniń 17 qalasyn qamtıdy, sonyń ishinde: Antalıa men Ystanbul, Madrıd pen Barselona, Býdapesht, Varshava, Býharest, Ábý-Dabı qalalary bar.