Erteń Almatyda VI qysqy respýblıkalyq Ýnıversıada bastalady
Ár eki jyl saıyn ótkiziletin bul sharanyń mańyzy zor. Sondyqtan da jarysty uıymdastyrýshylar men qatysýshylarǵa artylatyn jaýapkershilik te joǵary. Almatydaǵy «Suńqar» sport kesheninde VI respýblıkalyq qysqy Ýnıversıadaǵa daıyndyq jumystary qyzý júrgizilýde. 500-den asa stýdent jumyldyrylǵan eken. Qazir sálden soń daıyndyq jumystaryna osy jarystyń, ıaǵnı Ýnıversıadanyń sımvoly - Aq barys ta aralasady. El táýelsizdiginiń 25 jyldyǵymen qatar kelgen respýblıkalyq Ýnıversıadanyń joǵary deńgeıde ótýi úshin uıymdastyrýshylar bar kúsh jigerlerin salýda. Óıtkeni qyr astynda Búkilálemdik XXVIII Ýnıversıada tur. Sondyqtan jarystyń ashylýy men jabylý saltanatyna deıingi is-sharalar nazardan tys qalmaǵan.
«Bizdiń bul jerdegi eń basty nómirimiz deýge bolady. Sońyna taman osynda ózimizdiń júrgizýshi tramplınnen shańǵymen sekiredi. Ónerin kórsetedi. Bul jerde bizdiń vokalısterimiz ben horegraftarymyz da bar», - deıdi uıymdastyrý alqasynyń múshesi Ánýar Qadyrov.
. Sońǵy jyldary Búkilálemdik Ýnıversıada oıyndarynda qazaq stýdentteri tamasha tabystarǵa qol jetkizdi.2015-shi jyly Slovakııa men Ispanııada ótken qysqy oıyndarda bizdiń quramanyń 5 altyn 6 kúmis medalmen komandalyq synda úzdik úshtikten kórinýi osy sózimizge dálel. Qazaqstan Bilim jáne ǵylym mınıstrligi bolashaqta da stýdentterdiń sportyn damytý maqsatynda kóptegen is-sharalardy júzege asyrýda. Respýblıkalyq Ýnıversıada da úzdik shyqqandar keler jylǵy Búkilálemdik Ýnıversıadaǵa qatysýǵa múmkindik alady.
Bul joly sporttyń 10 túrinen synǵa túsetin elimizdiń 35 joǵarǵy oqý ornynan kelgen 1000-nan asa úmitkerdiń aıanyp qalmasy anyq. Erteńnen bastap Shymbulaq pen Medeý, Suńqar men Talǵar mańyndaǵy «Alataý» sport keshenderine tartysty jarys bastalady.
