Ermurat Bápı «Otaǵasy týraly» zań qabyldaýdy usyndy
ASTANA. KAZINFORM – Búgin Májilistiń jalpy otyrysynda depýtat Ermurat Bápı «Otaǵasy týraly» zań qabyldaýdy usyndy.
Aıta keteıik, jalpy otyrysta «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasy birinshi oqylymda talqylanyp jatyr. Zań jobasy týraly negizgi baıandamany Májilis depýtaty Juldyz Súleımenova jasady. Osyǵan oraı Ermurat Bápı áriptesinen zań jobasynyń avtory retinde «Otaǵasy týraly» zań qabyldaýǵa qatysty pikirin suraǵan edi.
«Osy zań jobasynda ákeniń, er-azamattyń rólin súmireıtip jibergen joqpyz ba? Osy jóninde sizdiń zań jobasynyń avtory retinde jeke pikirińizdi bilgim keledi. Zań jobasy negizinde qazaqstandyq múddeni qorǵaıdy. Bul jerde anaý-mynaý, ulys degen joq. Biraq, bizdiń nazardan shyǵarmaıtyn bir másele bar. Qazaqstan halqynyń 70 paıyzdan astamyn qazaq quraıtynyn bilemiz. Osy turǵydan kelgende myna jerde otyrǵandardyń kópshiligi «ákeń kele jatyr», «ákeń kelsin», «ákeń sazaıyńdy beredi» degen tárbıemen óstik qoı. Osy turǵydan kelgende ákeniń, er-azamattyń rólin kóterý úshin bálkim «Otaǵasy týraly» zań qabyldaýymyz kerek shyǵar?! Sizdiń óz oıyńyz qandaı?», - dep surady Ermurat Bápı.
Juldyz Súleımenovanyń atap ótýinshe, ákeniń otbasyndaǵy róli de, orny da qazaq tárbıesinde erekshe.
«Biz eger ult jáne ult bolashaǵy desek, onda áke degen sózben olardyń túgel baılanysyp, sabaqtasyp jatqanyn jaqsy bilemiz. Biraq, biz bul zańmen «bir qolymen besikti, bir qolymen álemdi terbetken» áıeldiń búgingi tańdaǵy turmystyq qarym-qatynastaǵy patrıarhaldyq ozbyrlyqa ushyraýyna belgili bir tosqaýyl qoıatyn baptardy engizip otyrmyz. Iá, mende siz sekildi ákelerdiń, er-azamattardyń, balalarymyzdyń bolashaǵyna qatysty oı-pikirim bar. Óıtkeni, biz eldiń bolashaǵyn uldyń bolashaǵymen baılanystyrǵan halyqpyz. Degenmen, Konstıtýtsııanyń 33-babynda jynysqa bólmeı, áıel men er-azamattyń genderlik teńdigi naqty kórsetilgen. Eger ákelerdiń rólin, otbasyndaǵy jalpy jaýapkershiligin, bala tárbıesindegi erekshe ornyn belgileıtin zań qajet bolsa, birinshi bolyp ázirleýge, birinshi bolyp qabyldaýǵa jáne onyń oryndalýyna ana retinde, osy eldiń qyzy retinde atsalysqym keledi», - dedi Májilis deptýtaty.
Osy oraıda Májilis tóraǵasy Erlan Qoshanov depýtat Ermurat Bápıge qarata: «Ermurat Seıitqazyuly, eger otaǵasy jábir kórip jatsa, ony da qorǵaıtyn zań bul. Bárine birdeı», - dep ázildedi.
