Ermahan Ybyraıymov jerlesterin sabyrǵa shaqyrdy

NUR-SULTAN. QazAqparat – Olımpıada chempıony Ermahan Ybyraıymov Jambyl oblysyndaǵy oqıǵaǵa baılanysty jerlesterin sabyrǵa shaqyrdy, dep habarlaıdy QazAqparat tilshisi.

«Zańsyz qadamdarǵa barmaý kerek. Jańalyqtardan úıler órtenip, qulap jatqanyn kórdik. Toqtaý kerek. Osy eldiń damýyna halqymyzdyń ár azamaty ózinshe úles qosyp, el bolyp otyrmyz. Dúngenderdi jaqsy bilemin. Eńbekqor, eginmen aınalysatyn azamattar. Olar da - Qazaqstan azamaty. Asyra siltep, artyq qımylǵa barýdyń keregi joq. Sabyr saqtańyzdar. Qazir Óskemende júrmin. Almatyǵa qaıtqannan keıin Qordaı jaqqa baryp, kópti sabyrǵa shaqyrǵym keledi», - deıdi Ermahan Ybyraıymov.

Eske sala keteıik, Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles boldy. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.

«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.

Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.