Erlan Saırov fermerlerge sýbsıdııa bólýdegi kemshilikterdi atady

ASTANA. QazAqparat – Májilis depýtaty Erlan Saırov fermerlerge sýbsıdııa bólý salasyndaǵy kemshilikterdi atady, dep habarlaıdy QazAqparat tilshisi.

«Aýmaly-tókpeli zamanda Qazaqstannyń agrarlyq sektory kúrdeli jaǵdaıǵa tap bolyp otyr. Óńirlerde 2022 jyly taýarlyq sýbsıdııalar 50 paıyz ǵana tólengen, ınvestıtsııalyq sýbsıdııalar 30-40 paıyzǵa tólendi, alynǵan qaryzdar boıynsha ekinshi deńgeıdegi bankterdiń paıyzdyq mólsherlemesin sýbsıdııalaý boıynsha da osyndaı jaǵdaı oryn aldy. Aýyl sharýashylyǵy mınıstrligi usynǵan ınvestıtsııalyq sýbsıdııalar jáne ekinshi deńgeıdegi bankterdiń paıyzdyq mólsherlemesin óteýge arnalǵan jańa gosagro.kz platformasy tolyq jumys istemeıdi, memlekettik derekqorlarmen ıntegratsııalanbaǵan, sýbsıdııa alýǵa ótinim qabyldaýǵa qabiletsiz», - dedi E. Saırov Premer-Mınıstr Álıhan Smaıylovtyń atyna joldaǵan saýalynda.

Onyń aıtýynsha, ótelmegen qaryzdar boıynsha paıyzdyq mólsherlemeni óteý úshin sýbsıdııa alý múmkindiginiń bolmaýy fermerlerdiń jaǵdaıyn qıyndatyp otyr. Kásipkerlerdi sýbsıdııalaý qaǵıdatyna sáıkes 6% ornyna bankterge kredıttiń tolyq mólsherlemesin, ıaǵnı 17-20 paıyz tóleýge májbúr etedi.

«Bıyl astyqty forvardtyq satyp alýǵa bólingen qarajattyń buryn-sońdy bolmaǵan qysqarýy oryn aldy. Máselen, Aqmola oblysy boıynsha 12 mlrd teńgege suranys bola tura, forvardtyq satyp alýǵa tek 4 mlrd teńge bólindi. Bul kóptegen sharýalardy aınalym qarajatynan shekteıdi. Qazaqstandaǵy astyq qory 2023 jylǵy 1 sáýirdegi jaǵdaı boıynsha byltyrǵy deńgeıden 1,5 ese kóp bolǵan, maıly daqyldar qory 22% artqan. Bul óz kezeginde aýyl sharýashylyǵy taýarlaryn óndirýshileri ósirgen eginniń edáýir bóligin sata almady degen sóz, ıaǵnı bıylǵy egis jumystaryn júrgizýge jetkilikti qarajat joq», - dedi depýtat.

Osy oraıda ol otandyq agrarlyq sektordy qoldaý úshin myna usynystardy jarııalady.

1. 2022 jylǵa arnalǵan sýbsıdııalardyń barlyq túri boıynsha qaryzdy qysqa merzimde óteý. 2023 jyly sýbsıdııalarǵa ótinim berý júıeleriniń tolyqqandy jumys isteýin qamtamasyz etý.

2. Bıyl sýbsıdııa tóleý úshin bıýdjetten qosymsha qarajat bólýdi qarastyrý.

3. Forvardtyq satyp alý somasyn byltyrǵy kórsetkishterge deıin ulǵaıtý.