Erlan Qoshanov: AÁK-ti paıda tapqysy kelgender emes, muqtaj jandar alýy tıis

QARAǴANDY. QazAqparat – Qaraǵandy oblysynyń ákimi Erlan Qoshanov ataýly áleýmettik kómek alatyn otbasylardyń tabysyn qaıta tekserýdi tapsyrdy, dep habarlaıdy QazAqparat tilshisi.

Qazirgi tańda óńirde áleýmettik tólemder alý úshin óz tabystaryn jasyrǵan adamdardy anyqtaýǵa kómektesetin mobıldi top jumysyn aıaqtap qaldy. Bir ókinishtisi, oblysta osyndaı otbasylar tabylyp jatyr.

«Aýlalardy aralaý nátıjeleri boıynsha 199 otbasy úshin AÁK tólemderin toqtatý týraly sheshim qabyldandy. 17 otbasy zańsyz alynǵan qarajatty óz erkimen óteıdi. Qazir qalǵandarmen ýchaskelik komıssııalar jumys isteýde. Bul qarajat sot arqyly óndirip alynady», - dep túsindirdi jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.

Óńirde barlyǵy 9 355 otbasy áleýmettik tólemder alady. Ótken jylmen salystyrǵanda bul kórsetkish 4 esege artty. Al bıýdjet qarajatynyń shyǵyndary 6 ese ósti.

«Ataýly áleýmettik kómekke shyn máninde muqtaj adamdarǵa arnalǵan naqty jáne aıqyn qoldaý kórsetetin tetikter bolýy qajet. Kómek ataýly bolýy, árqaısysymen jumys istelýi tıis. Masyldyqqa jol berýge bolmaıdy! Alaıaqtyq pen sybaılas jemqorlyqtyń kez kelgen faktileri úshin qatań jazalanatyn bolady. Qalalar men aýdandardyń ákimderi ol úshin jaýapty bolady. AÁK esepteý zańdylyǵyn jeke baqylaýǵa alý kerek», - dep tapsyrdy Erlan Qoshanov.