Erlan Qarın: Ákimder saılaýy – elimizdiń saıası damýyndaǵy aıtýly betburys
«Bilesizder, bıyl Prezıdenttiń bastamasymen elde tuńǵysh ret aýyl ákimderiniń tikeleı saılaýy ótedi. Osy saılaýǵa baılanysty birneshe zańǵa ózgerister engiziledi. Sol ózgeristerdi qamtıtyn zań jobalary kúni keshe Májiliske kelip tústi. Endi soǵan sáıkes Májiliste osyndaı talqylaýlar ótedi. Osynyń bárin biz de óz tarapymyzdan baqylap, qadaǵalap otyramyz. Qandaı talqylaý boldy, qandaı qosymsha usynys aıtylady degen sııaqty», - dedi Memleket basshysynyń kómekshisi.
Suhbat barysynda Prezıdent kómekshisi atalmysh saılaýdy eldiń saıası damýyndaǵy úlken betburysty oqıǵa dep sanaıtynyn jetkizdi.
«Atalyp otyrǵan ózgeristerdiń bári – úlken betburysty ózgerister. Mysalǵa bıyl birinshi ret ótkizileıin dep otyrǵan aýyl ákimderiniń tikeleı saılaýy arqyly 800-ge jýyq aýyl ákimi anyqtalady. Buryn janama túrde saılanǵan aýyl ákimderiniń ókilettigi toqtaıdy. Soǵan sáıkes, endigi ákimder tikeleı saılaý arqyly saılanady. Bul da elimizdiń saıası damýyndaǵy úlken bir aıtýly oqıǵa, jańa bir kezeń. Sebebi bizdiń halyq óziniń ákimderin tikeleı saılap, sol arqyly ózderiniń saıası quqyqtaryn keń aýqymda júzege asyrýdyń taǵy bir qosymsha múmkindigine ıe bolady», - dedi Erlan Qarın.