Erikti qoǵamdyq jumysqa aralasý stýdentterge ne beredi

NUR-SULTAN. QazAqparat - Erikti qoǵamdyq jumysqa aralasqysy kelgen stýdentterge arnalǵan saıt 1 qyrkúıekten bastap iske qosylady. Bul týraly búgin Úkimet úıindegi baspasóz máslıhatynda QR Aqparat jáne qoǵamdyq damý vıtse-mınıstri Juldyz Omarbekova aıtty, dep habarlaıdy QazAqparat tilshisi.

«Volonterlikpen aınalysqysy kelgen árbir jas 1 qyrkúıekten bastap iske qosylatyn saıtqa tirkelip, qyzmet salasyn (jetim balalarǵa, múgedek balalarǵa kómektesý, qandaı da bir qaıyrymdylyq uıymdaryna qatysý) tańdaǵannan keıin vaýcher alady. Olardyń osy vaýchermen oqý aqysyn tóleýge múmkindikteri bar», - dedi vıtse-mınıstr.

Óz kezeginde QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev atalǵan jobanyń jańa oqý jylynan bastalatynyn aıtty.

«Bul joba 1 qyrkúıekten bastalady. Jekemenshik, memlekettik ýnıversıtette bilim alyp jatqan árbir stýdent bul jobaǵa qatysýǵa quqyǵy bar. Atalǵan saıtta ózine erikti tapqysy kelgen uıymdar, sonymen qatar baǵdarlamaǵa qatysýǵa nıetti erikti stýdentter tirkele alady. Eriktiler tańdaýyna vaýcherdiń eki kredıtti jáne bes kredıtti eki túri usynylady. Erikti eki kredıtti vaýcherge 20 myń teńge alyp, tısti baǵdarlamany oryndaıdy. 5 kredıtti baǵdarlama boıynsha eki kredıtke qaraǵanda kóbirek jumys isteýge týra keledi», - dedi ol.

Onyń atap ótýinshe, saıtta bes sanat bolyp, oǵan árbir erikti stýdent tirkeledi. Jalpy, bul baǵdarlamamen 50 myń stýdentti qamtý josparlanǵan.