Erevan metrosynda Astananyń sýretteri paıda boldy

EREVAN. QazAqparat - Erevan qalasynyń metrosynda «Álem astanalary: Astanadan Erevanǵa» fotokórmesi ashyldy, dep habarlaıdy QazAqparattyń menshikti tilshisi. 

Kórme Astananyń 20 jyldyǵyna jáne Armenııa astanasyna 2800 jyl tolýyna oraı ashyldy. Onda «QazAqparat» HAA-dan, QR Syrtqy ister mınıstrliginiń arhıvinen jáne Ulttyq muraǵattan alynǵan sýretter kórsetilgen.

«Jastar», «Respýblıka alańy», «Marshala Bagramıana» stansalarynda Qazaqstan astanasynyń ǵımarattarynan quralǵan 100 fotosýret turǵyndar nazaryna usynyldy. Olardyń ishinde «Báıterek», «Aqorda», «Beıbitshilik jáne kelisim saraıy», «Han Shatyr», «Áziret Sultan» meshiti syndy qalanyń kórikti jerleri kórsetilgen. Sondaı-aq, kórmede «Armenpress» aqparat agenttigi usynǵan Armenııa astanasy Erevannyń tarıhı jáne muraǵattan alynǵan erekshe sýretteri beınelendi.

     «Biz kórmege qoıý úshin kóptegen sýretterdiń ishinen úzdikterin muqııat tańdadyq. Qazaqstan astanasynyń eń kórikti jerlerin berýge tyrystyq. Kórme negizgi úsh kezeńnen turady. Onyń birinshisi - zamanaýı, ekinshisi - tarıhı jáne úshinshisi qala turǵyndaryna arnaldy», - dedi Armenııadaǵy QR elshisi Tımýr Orazaev.

Fotokórmeniń saltanatty ashylý rásimine Armenııanyń mádenıet mınıstri L. Makýnts, Armenııanyń depýtattyq korpýsynyń, bıliginiń ókilderi, Erevannyń merııasy jáne sheteldik mıssııalar men halyqaralyq uıymdardyń ókilderi qatysty.

Kórme 10 shildege deıin jalǵasady.