Erbolat Dosaev óńirlerdegi ınflıatsııa sáıkessizdigin atady

NUR-SULTAN. QazAqparat – Óńirler boıynsha ınflıatsııa eleýli sáıkessizdikterdi kórsetýde. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Óńirler boıynsha ınflıatsııa eleýli sáıkessizdikterdi kórsetýde. Máselen, Mańǵystaý oblysynda ol respýblıkalyq deńgeıden 1,3 protsenttik tarmaqqa, Qaraǵandy oblysynda jáne Nur-Sultan qalasynda 0,4 protsenttik tarmaqqa asyp tústi», - dedi UB tóraǵasy.

Onyń aıtýynsha, jalpy respýblıka boıynsha 11,4 paıyz deńgeıinde bolǵanda 12 paıyzdan joǵary azyq-túlik ınflıatsııasy Qaraǵandy, Atyraý, Pavlodar oblystarynda tirkeldi. Azyq-túlikke jatpaıtyn ınflıatsııa boıynsha elde 5,3 paıyz bolǵanda Mańǵystaý oblysy 6,9 paıyzben aldyńǵy qatarǵa shyqty.

«Jalpy respýblıka boıynsha ınflıatsııa 4,1 paıyz bolǵan kezde 5 paıyzdan joǵary aqyly qyzmetter ınflıatsııasy Mańǵystaý oblysynda, Nur-Sultan qalasynda, Aqtóbe oblysynda tirkeldi», - dedi Erbolat Dosaev.