Erbolat Dosaev ınflıatsııaǵa yqpal etken sebepterdi atady
«Inflıatsııanyń týyndaýyna shildede 8,7%-ǵa jetken azyq-túlik taýarlary baǵasynyń ósimi yqpal etip otyr. Azyq-túlikke jatpaıtyn taýarlar baǵasy qalypty ósý qarqynyn kórsetti. Al aqyly qyzmetter baǵasynyń serpini tarıhı mınımýmda saqtaldy. Halyqtyń naqty aqshalaı kirisiniń ósýi aıasynda tutynýshylyq suranystyń keńeıýi ınflıatsııanyń jyldam ósýiniń negizgi táýekelderi bolyp qalady. Osyǵan oraı Úkimetten ınflıatsııanyń ósýine kóbirek yqpal etken jekelegen taýarlarǵa baǵanyń ósýin baqylaý sharalaryn kúsheıtýdi suraımyz», - dedi Erbolat Dosaev Úkimet otyrysynda.
Ulttyq bank tóraǵasy ishki valıýta naryǵyndaǵy ahýal kóp jaǵdaıda syrtqy faktorlardyń yqpalynda ekendigin aıtyp berdi. 12 tamyzdaǵy jaǵdaı boıynsha teńge baǵamy jyl basynan beri 0,9%-ǵa álsirep, bir AQSh dollary úshin 387,48 teńgeni qurap otyr.
«Syrtqy sektordaǵy jaǵdaı turaqsyz. Munaı baǵasy qubylyp tur. 31 shilde – 7 tamyz aralyǵynda munaıdyń álemdik baǵasy bir barrel úshin 65,2 AQSh dollarynan 56,2 AQSh dollaryna deıin kúrt tómendedi. Bul AQSh Prezıdentiniń Qytaı taýarlaryna baj salyǵyn engizý týraly málimdemesinen keıin boldy. 2019 jylǵy 9 tamyzdaǵy jaǵdaı boıynsha munaı baǵasy bir barrel úshin 58,5 AQSh dollaryna deıin ósti», - dep túsinikteme berdi Erbolat Dosaev.
Ulttyq bank basshysy atap ótkendeı, Reseı rýbli aıdyń basynan bastap 9 tamyzǵa deıin bir AQSh dollary úshin 63,4 rýblden 65,1 rýblge - 2,8%-ǵa álsiregen. Sondaı-aq, Erbolat Dosaev habarlaǵandaı, Ulttyq banktiń altyn valıýta rezervteri 2019 jylǵy 1 tamyzda 27,7 mlrd AQSh dollaryn qurap otyr.