Erbolat Dosaev ardagerlerdi Jeńis kúnimen quttyqtady
ALMATY. KAZINFORM — 9 mamyr qarsańynda Almaty ákimi Erbolat Dosaev Ekinshi dúnıejúzilik soǵys ardagerlerine baryp, syılyqtar tabystap, Qazaqstan Prezıdenti Qasym-Jomart Toqaevtyń atynan quttyqtaýyn jetkizdi.
Sonymen qatar, Memleket basshysynyń tapsyrmasymen ardagerlerge «Uly Otan soǵysyndaǵy Jeńiske 80 jyl» mereıtoılyq medalin tabys etti.
Olga Andreevna Savenko 9 mamyr kúni 102 jasqa tolady. Almatyda 7 synyp támamdaǵan soń Lenıngradtaǵy áskerı baılanys ýchılışesine oqýǵa túsken. Maıdanǵa 1941 jyldyń qyrkúıeginde 18 jasynda attanyp, Jeńis kúnine deıin boryshyn adal ótegen. Ol 1-shi jáne 2-shi Belarýs maıdandarynyń baılanys polkinde qyzmet etip, Polshany, Germanııany azat etýge jáne Berlın úshin shaıqastarǵa qatysqan. Kórsetken erligi men janqııarlyǵy úshin Otan soǵysy ordenimen, «Kenıgsbergti alǵany úshin», «Varshavany azat etkeni úshin», «Berlındi alǵany úshin» medaldarymen jáne basqa da mereıtoılyq nagradalarmen marapattalǵan.
Soǵystan keıin týǵan qalasyna oralǵan ol ómiriniń 57 jylyn Almaty telegrafynda jumys isteýge arnady. Joldasymen birge eki qyz tárbıelep ósirdi. Jyly ári jaıly atmosferada ótken kezdesýge ardagerdiń nemeresi de qatysty. Áńgime barysynda Erbolat Dosaev Olga Andreevnaǵa beıbitshilik úshin alǵys bildirip, onyń ómir joly barshamyzǵa erlik pen Otanǵa degen súıispenshiliktiń úlgisi ekenin atady. Qala ákimi shyn júrekten ardagerdi aldaǵy týǵan kúnimen quttyqtap, Uly Jeńiske qosqan baǵa jetpes úlesi úshin rızashylyǵyn bildirdi.
— Sizge qarap, kóńilge qýanysh uıalaıdy. Sizdiń kórkem minezińiz ben ómirge degen qushtarlyǵyńyz bizge shabyt beredi — bul óte mańyzdy. Olga Andreevna, ózińizben qatar otyryp, kúlkińizdi kórý — úlken qýanysh. Qazirgi jastardyń boıynda sizdegi bar qýat pen sergektik darysyn. Sizge shyn júrekten zor densaýlyq tileımin, — dedi Erbolat Dosaev.
Ekaterına Aleksandrovna Baranovaǵa kezdesý de sondaı jyly ári jaıly jaǵdaıda ótti. Ákimdi ol páterinde jıenimen birge qarsy aldy.
Ardager Kýrsk oblysynda týyp-ósken. Jeti synyp bitirgennen keıin feldsher mamandyǵy boıynsha medtehnıkýmǵa túsken. Týǵan jeri jaýdan azat etilgen soń Ekaterına Aleksandrovna áskerge shaqyrylyp, 1-shi Ýkraına maıdanyna jiberilgen. Ol lazarette jaralanǵan sarbazdarǵa qamqorlyq kórsetti. Jeńisti Chehoslovakııanyń Karlovy Vary qalasynda qarsy alǵan.
Erligi men janqııar eńbegi úshin ІІ dárejeli Otan soǵysy ordenimen, «Jaýyngerlik eńbegi úshin», «Germanııany jeńgeni úshin», «Pragany azat etkeni úshin» medaldarymen jáne basqa da medaldarmen marapattalǵan.
Soǵystan keıin jubaıymen birge onyń týǵan jeri Qazaqstanǵa qonys aýdaryp, ul ósirip, uzaq jyl Mınıstrler keńesi janyndaǵy aýrýhanada qyzmet etken. Qazirdiń ózinde densaýlyǵyna qaramastan, rýhy myqty, sanasy sergek.
Erbolat Dosaev Ekaterına Aleksandrovnaǵa otty jyldardaǵy janqııarlyq eńbegine sheksiz qurmet pen alǵys bildirdi.
— Siz 1943 jyldan bastap maıdanda medbıke bolyp jumys istep, talaıdy ajaldan arashalap qaldyńyz. Sizge myń alǵys. Shyn júrekten zor densaýlyq pen kóterińki kóńil-kúı tileımin, — dedi ákim.
Qala basshysyn 101 jastaǵy Qambar Ámiruly Sársenov pen onyń nemeresi, kelini men shóberesi shańyraǵynda qýana qarsy aldy. Ákim ardagerge soǵys jyldaryndaǵy erligi, eńbekke adaldyǵy men qaharmandyǵy úshin alǵys aıtyp, zor densaýlyq, amandyq pen uzaq ǵumyr tiledi.
Qambar Ámiruly 1942 jyly tamyzda áskerge shaqyrylyp, úsh ret jaralanǵan. Belarýsti, Latvııany, Lıtvany jáne Polshany azat etýge qatysqan. Onyń kıteli І jáne ІІ dárejeli Otan soǵysy ordeni, ІІ jáne ІІІ dárejeli Dańq ordeni, «Qyzyl Juldyz» ordeni, sondaı-aq, «Jaýyngerlik eńbegi úshin», «Kenıgsbergti alǵany úshin», «Germanııany jeńgeni úshin» medaly syndy san túrli marapatqa toly. Qambar Sársenov — ІІM-niń qurmetti ardageri. Іshki ister organdaryndaǵy qyzmetin aıaqtaǵan soń Almaty elektr jelileri mekemesinde jumys istep, qalanyń damýyna úles qosqan.
Qala basshysy taǵy bir ardager — Vasılıı Ivanovıch Dolbnıanyń úıine de at basyn burdy. Ol 1927 jyly Almaty oblysynda dúnıege kelgen. 1944 jyly áskerge shaqyrylyp, Qıyr Shyǵysta barlaýshy retinde qyzmet etken. 1951 jyldyń mamyrynda alty jarym jyl áskerı qyzmetten keıin úıine oralǵan.
Vasılıı Ivanovıchtiń jaýyngerlik jáne eńbektegi erligi kóptegen orden jáne medalmen marapattalǵan. Onyń úsh balasy, tórt nemeresi jáne tórt shóberesi bar. Qazir ardager ul-qyzymen birge turady. Mereke kúnderin ardager úlken otbasymen birge qarsy alyp otyr.
Almaty ákimi barlyq maıdangerdi 28 gvardııashy-panfılovshylar saıabaǵyndaǵy Ardagerler alleıasynyń ashylýyna shaqyryp, olardyń ómir joly erliktiń, batyrlyq pen Otan aldyndaǵy adaldyqtyń jarqyn úlgisi ekenin atap ótti.
Jeńis kúni qarsańynda ardagerlerge qala ákiminiń orynbasarlary men aýdan ákimderi de baryp, merekemen quttyqtap, myqty densaýlyq pen baqyt tilep, 9 mamyr kúni 28 gvardııashy-panfılovshylar saıabaǵynda ótetin Jeńis kúnin merekeleýge shaqyrdy.
Búginde Almatyda Uly Otan soǵysynyń 21 ardageri turady. Erbolat Dosaevtyń tapsyrmasymen bıyl bir rettik járdemaqy kólemi 5 mıllıon teńgege deıin kóbeıdi. Ardagerler medıtsınalyq qyzmetpen qamtylǵan, áleýmettik kómek alady.
Buǵan deıin Almaty aspanynda soǵys batyrlarynyń beınesi kórsetiletini habarlandy.