Erbolat Dosaev aldaǵy ekonomıkalyq damý kórsetkishine boljam jasady

NUR-SULTAN. QazAqparat – Álemdik jalpy ishki ónim boljamy 2021 jyly 6 paıyz deńgeıinde saqtaldy. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq bank tóraǵasy Erbolat Dosaev málim etti, dep habarlaıdy QazAqparat tilshisi.

«Damýshy elderdegi vaktsınatsııanyń álsiz qarqynyna jáne aýrýdyń ósýine baılanysty Halyqaralyq valıýta qory bıylǵy jylǵy 27 shildede ishki jalpy ónim boljamyn 6,3%-ke deıin 0,4 paıyzdyq tarmaqqa tómendetý jaǵyna qaıta qarady. Damyǵan elderde vaktsınatsııanyń joǵary qarqyny men saqtalyp otyrǵan yntalandyrýlar esebinen Halyqaralyq valıýta qory 2021 jyly 5,6%-ke deıin 0,5 paıyzdyq tarmaqqa kúrt ósýdi kútýde. Álemdik ishki jalpy ónim boljamy 2021 jyly 6% deńgeıinde saqtaldy», - dedi E. Dosaev.

Onyń atýynsha, damýshy elderdiń ósý perspektıvalarynyń nasharlaýyna baılanysty 2022 jyldyń sońyna qaraı olardyń ekonomıkalaryn qalpyna keltirý kútiledi. Degenmen, Halyqaralyq valıýta qory Qazaqstan ekonomıkasynyń ósýi jónindegi boljamdy 3,2% deńgeıinde saqtady. Budan bólek, iskerlik belsendilik qarqynynyń baıaýlaýyna qaramastan, álemdegi proınflıatsııalyq qysym saqtalyp otyr. Bul úrdis jetkizý merzimin uzartýmen birge keıinge qaldyrylǵan suranysty iske asyrý aıasynda suranys pen usynystyń teńgerimsizdigin kúsheıtedi.

«Birikken Ulttar Uıymynyń FAO málimetteri boıynsha shildede azyq-túlik taýarlarynyń álemdik baǵasy qatarynan eki aı boıy tómendep, 123 tarmaq belgisine jetti. Bul rette FAO azyq-túlik baǵalary ındeksiniń jyldyq ósimi 29,1%-ti qurap, joǵary deńgeıde saqtalýda. Boljamdar boıynsha damyǵan elderde ınflıatsııa 2021 jyldyń sońyna qaraı turaqtanady, damýshy elderde 2022 jyldyń sońyna deıin nysanaly deńgeıden joǵary mólsherde saqtalady, buǵan azyq-túlik, shıkizat tarapynan proınflıatsııalyq qysym jáne valıýta baǵamdarynyń álsireýi yqpal etedi», - dedi UB basshysy.