Erbol Qarashókeev jedel shtab otyrysyn ótkizdi
TARAZ. KAZINFORM — Jambyl oblysynyń ákimi Erbol Qarashókeev jer silkinisi oryn alǵan Merki jáne T.Rysqulov aýdandaryndaǵy tabıǵı apat saldaryn joıý boıynsha jedel shtab otyrysyn ótkizdi. Bul týraly oblystyq ákimdiktiń baspasóz qyzmeti málim etti.
Basqosýǵa azamattyq qorǵaý qyzmetiniń, jergilikti atqarýshy organdardyń, tıisti vedomstvolardyń basshylyq ókilderi qatysty.
Jıynda Merki jáne T.Rysqulov aýdandarynyń ákimderi aǵymdaǵy jaǵdaı boıynsha esep berdi.
Aýdandarda zardap shekken azamattar tirkelmegen. Tirshilikti qamtamasyz etý nysandary qalypty rejımde jumys isteýde.
Jalpy Merki jáne T.Rysqulov aýdanynda 14 áleýmettik nysan ishinara zardap shekken. Onyń ishinde 9 bilim berý, 2 densaýlyq saqtaý, 1 áleýmettik qorǵaý, 1 sport jáne 1 mádenıet nysany bar.
Qosymsha búlingen nysandardy anyqtaý, zerdeleý jumystary jalǵasyp jatyr.
– Memleket basshysy óńirdegi jaǵdaıdy jeke baqylaýynda ustap otyr. Prezıdent áleýmettik nysandar men turǵyn úılerdi qalpyna keltirý jáne jóndeý jumystaryn júrgizý úshin qajetti kómek kórsetýdi júktedi. Premer-Mınıstrdiń tapsyrmasy boıynsha Tótenshe jaǵdaılar vıtse-mınıstri bastaǵan úkimettik jumys toby oblysqa jiberildi. Áleýmettik jáne tirshilikti qamtamasyz etý, ónerkásip nysandarynyń jaı-kúıi, jol qatynastary turaqty baqylaýda bolýy qajet. Turǵyndardyń qaýipsizdigi bárinen mańyzdy, – degen Erbol Qarashókeev shyǵyn kólemin anyqtaý úshin keshendi sharalar qabyldap, turǵyndardyń talap-tilekterin barynsha nazarǵa alýdy tapsyrdy.
Sonymen birge aýdan ákimderine aýyldyq eldi mekenderdegi nysandardy tolyq aralap, ahýaldy kózben kórýdi, turǵyndar arasynda túsindirý jumystaryn kúsheıtýdi, qajettiligine qaraı psıhologııalyq kómek kórsetýdi eskertti.
Oblys ákimi BAQ pen áleýmettik jelilerde shyndyqqa janaspaıtyn jalǵan aqparattardyń taralyp jatqanyna nazar aýdardy. Jambyldyqtardy tek resmı aqparat kózderine ǵana senýge shaqyrdy.
Aıta keteıik, turǵyndardy alańdatqan Merki aýdanyna tehnıkalardyń kelýi, ýaqytsha shatyrlardyń ornatylýy — yqtımal tótenshe jaǵdaılardyń aldyn alýǵa baǵyttalǵan algorıtmge sáıkes júrgizilýde. Alańdaýǵa negiz joq. Bul barlyq tıisti mekemelerdiń kúsheıtilgen rejımde jumys istep, qaýipsizdikti qamtamasyz etýge baǵyttalǵan saqtyq sharalary ǵana bolyp tabylady.
Eske sala keteıik, 2025 jyldyń 28 naýryz kúni túnde Jambyl oblysynyń birqatar aýdany men Taraz qalasynda jer silkinisi tirkeldi.
Jer asty dúmpýiniń joǵary qarqyny – 5 ball – Merki aýdanynda oryn aldy. T.Rysqulov aýdanynda jer silkinisiniń kúshi 4 balldy, Taraz qalasy men qalǵan aýdandarda – 2 balldy qurady.
Jer silkinisi 15:56-da qaıta sezildi.
Oblys ákiminiń tapsyrmasyna sáıkes jedel shtab jumys istep jatyr.
Eske sala keteıik, buǵan deıin Almatydan 323 shaqyrym jerde jer silkinisi tirkelgenin jazǵan bolatynbyz. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan.
Artynsha Turar Rysqulov aýdany Qaraqystaq aýylyndaǵy mádenıet úıi, Merki aýdandyq aýrýhanasy, Oıtal aýylyndaǵy mektep ǵımaratynyń qabyrǵasynda jaryqshaq paıda bolǵany anyqtalǵan edi. Osyǵan oraı óńirde jedel shtab jumysyn bastady.
Arnaıy komıssııa shyǵyndy anyqtaý jumystaryn júrgizetini belgili boldy.
Kóp uzamaı Jambyl oblysynda taǵy da jer silkingen bolatyn.
TJM Jambyl oblysyndaǵy jer silkinisiniń qýatyna baılanysty málimetti jarııalady.
Úkimettik jumys toby jaǵdaıdy saraptap, baǵalaý jáne shara qoldaný úshin Jambyl oblysyna jiberildi.
Prezıdentke Jambyl oblysyndaǵy jer silkinisinen keıingi ahýal baıandaldy.