Erbol Qarashókeev: Astyq saqtaýǵa qajetti oryn jetkilikti

NUR-SULTAN. QazAqparat – Oblys ákimdikteri astyq saqtaý oryndarynyń daıyndyǵyn qamtamasyz etýi qajet. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Mınıstrlik elevatorlardyń jańa ónimdi qabyldaýǵa daıyndyǵyna turaqty monıtorıng júrgizýde. Respýblıkada astyqty saqtaýdyń jalpy syıymdylyǵy 29,1 mln tonnany, onyń ishinde astyq qabyldaý kásiporyndarynda 12,6 mln tonnany, aýyl sharýashylyǵy taýaryn óndirýshilerde 16,5 mln tonnany quraıdy», - dedi mınıstr.

Onyń aıtýynsha, atalǵan astyq saqtaý syıymdylyǵy ótken jyldardaǵy aýyspaly qaldyqtardy eskere otyryp, boljamdy egindi saqtaý úshin jetkilikti.

«Oblys ákimdikteri jańa astyqty qabyldaýǵa astyq saqtaý oryndarynyń daıyndyǵyn qamtamasyz etýi qajet», - dedi Erbol Qarashókeev.

Foto: primeminister.kz