EO men AQSh saýda kelisimine qol jetkizdi

ASTANA. KAZINFORM – Taraptar tarıftik saıasat boıynsha ymyraǵa kele aldy, - dep habarlaıdy Euronews. 

Shotlandııadaǵy kezdesýde AQSh prezıdenti Donald Tramp pen Eýrokomıssııanyń basshysy Ýrsýla fon der Lıaıen Vashıngton belgilegen merzim — 1 tamyz qarsańynda ózara baj salyǵy boıynsha kelisimge qol jetkize aldy. AQSh kelisimsiz EO-dan keletin barlyq taýarǵa 30% baj salyǵyn engizýge ýáde berdi.

BBC habarlaǵandaı, Tramp baspasóz máslıhatynda AQSh-qa Eýropalyq Odaq elderinen ımport tarıfi kem degende 15% bolatynyn aıtty. Sonymen qatar onyń aıtýynsha, EO elderi AQSh-tan 150 mıllıard dollarlyq áskerı tehnıkany, energııa tasymaldaýshylardy satyp alyp, Amerıka ekonomıkasyna 600 mıllıard dollar ınvestıtsııa salady.

Osylaısha, iri naryq oıynshylary arasyndaǵy saýda soǵysy toqtatylady. Tramp kóktemde AQSh-tyń saýda seriktesterimen tarıftik saıasatty ózgertý baǵytyn jarııalaǵan edi, muny kommertsııalyq qatynastardy teńestirýge degen umtylyspen baılanystyrdy.

Fon der Lıaıen bul kelisimdi «úlken» dep atady. Kezdesý qarsańynda ol da, Tramp ta onyń aıaqtalý múmkindigin «50-50» dep baǵalady.

Bul kelisim Vashıngton men Brıýssel arasyndaǵy tórt aıǵa sozylǵan kúrdeli kelissózderge núkte qoıdy.

AQSh-tyń baj salyǵyna jaýap retinde EO qarsy sharalar tizimin bekitkenin jazǵan edik.