EO astanasynda Qazaqstan táýelsizdiginiń 30 jyldyǵyna arnalǵan halyqaralyq konferentsııa ótti
Іs-sharaǵa Eýropa syrtqy is-qımyl qyzmetiniń, Eýropa Parlamentiniń, Eýropa komıssııanyń, Energetıkalyq Hartııa hatshylyǵynyń ókilderi, Belgııada akkredıttelgen dıplomatııalyq ókildikterdiń basshylary men qyzmetkerleri, Brıýsseldiń akademııa jáne mádenıet qaıratkerleri, sondaı-aq qazaqstandyq dıaspora men jergilikti BAQ ókilderi qatysty, dep habarlaıdy QazAqparat QR Syrtqy ister mınıstrliginiń baspasóz qyzmetie silteme jasap.
Qazaqstannyń Belgııadaǵy elshisi Marǵulan Baımuhan konferentsııa qatysýshylaryna arnalǵan sózinde egemen elimizdiń 30 jyl ishindegi áleýmettik-ekonomıkalyq jáne mádenı-gýmanıtarlyq salalardaǵy negizgi jetistikterin, sondaı-aq syrtqy saıasattaǵy jetistikterin atap ótti.
QR Tuńǵysh Prezıdenti – Elbasy N.Nazarbaevtyń basshylyǵymen memlekettilik pen táýelsizdikti nyǵaıtýǵa jáne Qazaqstan Prezıdenti Q.Toqaevtyń basshylyǵymen eldi odan ári saıası jańǵyrtýǵa basty nazar aýdaryldy.
Qazaqstannyń bolashaǵy týraly aıta kele, M.Baımuhan Memleket basshysy bastamashylyq etken iske asyrylyp jatqan saıası reformalardyń orny tolmas sıpatqa ıe ekenin jáne eldegi azamattyq qoǵamdy odan ári nyǵaıtýǵa alyp keletinin atap ótti. Osyǵan baılanysty, ol qazaqstandyq jastardyń mańyzdy rólin jáne olar úshin qolaıly jaǵdaılar jasalǵanyn atap ótti. Qazaqstandyq dıplomat 15 myńnan astam jas qazaqstandyqtyń «Bolashaq» prezıdent baǵdarlamasynyń arqasynda álemniń bedeldi joǵary oqý oryndarynda bilim alýyn elimizdiń úlken jetistigi dep atady.
Ol is-shara qonaqtaryna Qazaqstannyń qarýsyzdaný jáne ıadrolyq qarýdy taratpaý salasyndaǵy kóshbasshylyǵy, EQYU-ǵa tóraǵalyq etýimizdiń jáne Astana Sammıtin ótkizýimizdiń, Islam yntymaqtastyǵy uıymyndaǵy, BUU Qaýipsizdik keńesiniń 2017-2018 jyldarǵa turaqty emes múshesi bolyp saılanýymyzdyń, sondaı-aq el basshylyǵynyń túrli halyqaralyq máseleler boıynsha bitimgerlik róliniń zamanaýı dıplomatııa tarıhyndaǵy mańyzdy kezeńderi týraly egjeı-tegjeıli aıtyp berdi.
Bizdiń elimizdiń Eýropalyq Odaqpen yntymaqtastyǵynyń perspektıvalary týraly aıta otyryp, M.Baımuhan Prezıdent Q.Toqaevtyń taıaýdaǵy Brıýsselge resmı sapary kezinde kórsetilgen qarym-qatynastardyń óte joǵary serpini men sapaly deńgeıin atap ótti. Ol sapar barysynda jasyl ekonomıkaǵa kóshý, saýda jáne ınvestıtsııalar, klımattyń ózgerýine qarsy kúres, Ortalyq Azııada turaqty damý jobalaryn iske asyrý jáne óńirlik qaýipsizdik máseleleri sııaqty yntymaqtastyqtyń naqty basym salalary belgilengenin atap ótti.
ESІQ atynan sóz sóılegen Reseı, Shyǵys seriktestigi, Ortalyq Azııa, óńirlik yntymaqtastyq jáne EQYU boıynsha dırektordyń keńesshisi Borıs ıAroshevıch Qazaqstannyń damýyna joǵary baǵa berip, ony EO-nyń mańyzdy jáne senimdi seriktesi dep atady.
«Táýelsizdik alǵannan beri Qazaqstan ulttyq, óńirlik jáne halyqaralyq deńgeıde úlken progreske qol jetkizdi. Qazaqstannyń Tuńǵysh Prezıdenti N.Nazarbaevtyń basshylyǵymen jáne 2019 jyldan bastap Prezıdent Q.Toqaevtyń basshylyǵymen sizdiń elińiz ishki reformalar men saıası jańǵyrý protsesiniń órshil jolyna tústi», - dep atap ótti ol.
B.ıAroshevıch Qazaqstan Eýroodaqpen Keńeıtilgen áriptestik jáne yntymaqtastyq týraly kelisimge (KÁYK) qol qoıǵan OA óńirindegi alǵashqy el bolyp tabylatynyn atap ótti. Ol sondaı-aq osy jyl Prezıdent Q.Toqaevtyń sapary jáne basqa da joǵary deńgeıdegi saparlar yqpal etken Qazaqstanmen qarym-qatynasta serpindi bolǵanyn atap ótti. Eýropalyq dıplomat Aýǵanstannan Almatyǵa UNAMA qyzmetkerlerin kóshirý boıynsha kórsetken kómegi jáne AIR-ǵa gýmanıtarlyq kómek kórsetý boıynsha kúsh-jigeri úshin alǵysyn bildirdi.
Brıýssel Dıplomatııalyq akademııasynyń keńesshisi Jan de Brabander qonaqtardyń nazaryn daǵdarys kezinde «qaýipsizdik jastyǵy» retinde qyzmet etetin Ulttyq ál-aýqat qoryn qurǵan el basshylyǵynyń strategııalyq jáne kóregen saıasatyna aýdardy. Ol sondaı-aq kómirsýtegi beıtaraptyǵyna qol jetkizý jáne klımattyń ózgerýine qarsy kúres boıynsha eldiń ózine qabyldaǵan mindettemelerin joǵary baǵalady. Sondaı-aq, Prezıdent Q.Toqaevtyń «Halyq únine qulaq asatyn memleket» tujyrymdamasyna sáıkes júrgizip jatqan reformalaryna oń baǵa berdi.
Energetıkalyq Hartııa hatshylyǵynyń ókili Marat Terterov táýelsizdiktiń alǵashqy kúnderinen bastap ınvestorlarǵa qolaıly jaǵdaı jasaýǵa baǵyttalǵan el basshylyǵynyń ekonomıkalyq saıasatyn erekshe atap ótti.
Onyń pikirinshe, mundaı saıasat el ekonomıkasyna sheteldik ınvestıtsııalardyń úlken aǵymyn qamtamasyz etti, bul óz kezeginde eldiń damýyna qýatty serpin berdi. Ol sondaı-aq kópvektorly syrtqy saıasat Qazaqstannyń Reseımen de, Batys elderimen de birdeı jaqsy qarym-qatynas ornata alǵan halyqaralyq arenadaǵy tabysynyń mańyzdy quramdas bóligi bolyp tabylatynyn málimdedi.
Іs-shara qonaqtaryna Prezıdent Q.Toqaevtyń áleýmettik-ekonomıkalyq reformalary, Qazaqstannyń halyqaralyq qaýipsizdikke qosqan úlesi, klımattyń ózgerýimen kúres jáne t. b. týraly aqparattyq materıaldar taratyldy.
