Energetıka mınıstrligi AES salý jónindegi referendýmǵa qalaı daıyndalyp jatyr

Energetıka mınıstrligi AES salý máselesi jóninde ótetin referendýmnyń aspektilerin pysyqtaýǵa kiristi. Vıtse-mınıstr Álibek Jamaýov redaktsııa saýalyna joldaǵan jaýabynda osyndaı málimet aıtty, dep habarlaıdy QazAqparat.

«Energetıka mınıstrligi múddeli memlekettik organdarmen birlesip, Prezıdenttiń referendým ótkizý týraly tapsyrmasyn iske asyrýdyń barlyq múmkin aspektilerin pysyqtap jatqanyn habarlaımyz.Referendým jónindegi máselege qatysty Memleket basshysy 2023 jylǵy 1 qyrkúıektegi «Ádiletti Qazaqstannyń ekonomıkalyq baǵyty» atty Joldaýynda osy máseleni halyqpen aldyn ala jarııa talqylaýdy júrgize otyryp, Qazaqstanda atom elektr stantsııasyn salý máselesi boıynsha jalpyulttyq referendým ótkizýge bastamashy bolǵan», - dep jazylǵan mınıstrliktiń redaktsııa saýalyna bergen jaýabynda.

Vıtse-mınısr Álibek Jamaýovtyń sózine qaraǵanda, referendýmnyń naqty qaı kúni ótetini áli belgisiz.

«Prezıdent óz Joldaýynda referendým ótkizý merzimderi keıinirek belgilenetinin atap ótti. Referendým ótkizý tártibi 1995 jylǵy 2 qarashadaǵy «Respýblıkalyq referendým týraly» Qazaqstan Respýblıkasynyń Konstıtýtsııalyq zańymen reglamenttelgen», - delingen jaýapta.