«Endi ózge elderdi teksere alamyz»» - baspasózge sholý
***
«Egemen Qazaqstan» gazetiniń búgingi sanynda «Almatydaǵy ınnovatsııalyq jobalar forýmy» atty maqala basyldy. Elbasy Nursultan Nazarbaev Almaty qalasyna jasaǵan jumys sapary barysynda ál-Farabı atyndaǵy Qazaq ulttyq ýnıversıtetinde ótken ınnovatsııalyq jobalar forýmyna qatysty. Prezıdenttiń ózi tóraǵalyq etken keleli keńeste elimizdiń ınnovatsııalyq klasterin jetildirý jáne odan ári qalyptastyrý máseleleri qozǵalyp, Elbasynyń tikeleı tapsyrýymen irgesi qalanǵan Innovatsııalyq tehnologııalar parkiniń damýy men keleshegi týraly sóz qozǵaldy. Elimizde eki birdeı ınnovatsııalyq klaster qalyptasyp kele jatqany belgili. Onyń biri - Astanada, Nazarbaev Ýnıversıtettiń arqaýynda, al ekinshisi - Almaty qalasynda, Innovatsııalyq tehnologııalar parkiniń jan-jaqty jetildirilgen kesheninde.
Keńes barysynda Investıtsııalar jáne damý mınıstri Áset Isekeshev ınnovatsııalyq damý salasyndaǵy ahýal týraly baıandady. Onyń aıtýynsha, ınnovatsııalyq belsendilik úlesi 2009 jylmen salystyrǵanda 2 ese ulǵaıǵan jáne 2014 jyldyń qorytyndysy boıynsha 10 paıyzdy quraýy tıis. Bul kórsetkishti 2020 jylǵa qaraı 20 paıyzǵa, al ІJÓ-degi ınnovatsııalyq ónimderdiń úlesin 2,5 paıyzǵa deıin arttyrý josparlanyp otyr. Sońǵy ýaqytqa deıin qaralǵan 3500-den astam jobanyń 577-si maquldanyp, qoldaý tapty.
Bas bacylymda «Astyq mol bolsyn desek, jańa jolmen damý kerek» degen kólemdi maqala jarııalandy. Eldi mekenderdegi kásiporyndardaǵy qyzmetkerlerge turǵyn úıler salýdy qarjylandyrý aýadaı kerek. Aýyl turǵyndary úshin ınjenerlik-kommýnıkatsııalyq jelilerdi tartýǵa, áleýmettik jaǵdaılaryn túzetýge úndeıtin bastamashyl jobalardy tikeleı qarjylandyrýdy, sondaı-aq, «Bıznestiń jol kartasy-2020», «Aq bulaq» baǵdarlamalaryn engizý múmkindikterin jasaǵan lázim. Sóıtip, «Jumyspen qamtý-2020» baǵdarlamasy boıynsha kadrlardy turaqtandyrý úshin 90 paıyzdyq mólshermen memlekettiń qatysýymen qarjy salyp, kelesi 10 paıyzyn óz esebi negizinde tóletip, turǵyn úıler salý isi qolǵa alynýy tıis. «Osy baǵdarlamany uzaq merzimdi negizde qaldyrýdy kózdep, úıdi paıdalanatyn turǵyndarǵa birqatar talaptar qoıylýy shart. Naqtysy, úıler jekeshelendirý quqyǵynsyz, qyzmettik bolyp qalýy kerek. Munymen birge, sharýashylyqpen eńbek shartyn buzǵan kezde turǵyn úıdi jalǵa alý sharty ózdiginen kúshin joıýy mańyzdy»,-dep jazady maqala avtory
***
«Aıqyn» gazetiniń jazýynsha, Qazaqstandyq salyqshylar endi AQSh, Germanııa, Ulybrıtanııa, Kanada, Italııa, Frantsııa jáne basqa da elderdegi tekseristerge qatysa alatyn bolady.
Senattyń Qarjy jáne bıýdjet komıteti keshegi keńeıtilgen otyrysynda osyndaı qyzyqty múmkindikter beretin halyqaralyq qujatty quptady. Bir ǵajaby sol, bul joba arqyly Qazaqstan offshorlarmen «ákimshiliktik» baılanysqa shyǵýǵa ázirlenýde.
Álemdegi barlyq damyǵan memleketter múshe «Ekonomıkalyq yntymaqtastyq jáne damý uıymynyń» (EYDU) osy máselelerdi qarastyratyn arnaıy Konventsııasy keshe ratıfıkatsııalaýǵa tolyq daıyn etildi. Senattyń Salyq komıtetiniń osy kúngi jıynyna «Ózgerister engizý týraly Hattamamen engizilgen túzetýleri bar Salyq isteri boıynsha ózara ákimshilik kómek týraly Konventsııany ratıfıkatsııalaý» jobasy shyǵaryldy.
Bul qujat qysqasha aıtqanda, qazaqstandyq salyqshylarǵa sheteldik áriptesterimen emin-erkin aqparattar almasýǵa, sheteldegi salyqtyq tekseristerge qatysýǵa jáne basqa memleketterde qarjy-aktıvteri bar kompanııalardan qaryzdaryn óndirip alýǵa múmkindik beredi. Bul jaıynda «Endi ózge elderdi teksere alamyz» degen maqaladan oqı alasyzdar.
Osy basylymda «Halal men zalal» atty maqala berilgen. «Dúken sórelerinen «halal» degen belgi soǵylǵan et ónimderin musylman túgili, ózge dindi ustanatyndar da kóptep satyp alýynyń astarynda ne bar? Bir ǵana sebep: ol - tazalyq. Osylaısha, tamaqtan da tazalyq izdegender saýdany qyzdyrdy. Tipti sonaý Japonııada jappaı halal taǵamdar jeý dástúrge aınalǵanyn ınternetten oqyǵanda, bul úrdistiń keleshekte de qanatyn keń jaıa beretindigine senesiń», - dep jazady gazet.
***
«Ana tili» gazetiniń sońǵy sanynda «Besiktiń qadirin bileıik» degen maqala kópshilik nazaryna usynylǵan. «Birde qala kósheleriniń qıylysynan ótip bara jatyp, turǵyn úı janyndaǵy qoqys jáshigine kózim tústi. Qoqys jáshigi aldynda qasıetti, kıeli qutty múlik, sábıdiń altyn uıasy bolyp esepteletin besigimizdi kórdim. Apyr-aı, ony tastaǵan kim eken dep ań-tań boldym. Jaqynda ǵana bir basylymnan «Qazaqtar besikti qoqysqa laqtyryp jatyr» degen syndy maqalany oqyǵanymda jaǵamdy ustaǵan edim. Al mine, ózim osyndaı kórinistiń kýási boldym. Ata-babamyzdan kele jatqan besikti qoqysqa teńep laqtyrýǵa kimniń ǵana dáti bardy eken ...» - dep jazady maqala avtory.
