Endaýment qorǵa sheteldikter donor bola ala ma

ASTANA. KAZINFORM — Ǵylym jáne joǵary bilim mınıstri Saıasat Nurbek Májilistegi baspasóz máslıhatynda endaýment qordy separatıstik maqsatqa paıdalanýdyń táýekelderi týraly pikir bildirdi.

— Endaýment qorǵa sheteldikter men sheteldik úlesi bar kompanııalar, qarjy uıymdary donor bola ala ma? Qazaq tilin damytýǵa arnalǵan endaýment qordyń úlgisimen eldegi 130 etnostyń ókilderi óz tilderin damytý qoryn quramyz dese, shekteý bola ma? Bul separatıstik pıǵyldardy órshitpeı me, — dep surady jýrnalıst.

Mınıstr ózderi ázirlegen zań jobasynda ondaı táýekelderdi barynsha eskerilgenin aıtty.

— Endaýment qory bilim, ǵylym, buqaralyq sport salasynda ǵana qurylady. Dinge, dilge, basqa salalar úshin zańda shekteý kózdelgen. Al salymshylar tek Qazaqstan azamattary men qazaqstandyq zańdy tulǵalar ǵana bola alady. Ol jaǵyn eskerdik, sheteldik basqa qorlardy shektedik. Quryltaıshylar da, salymshylar da sheteldik bola almaıdy, — dedi mınıstr.

Vedomstvo basshysy endaýment qor qurýǵa tilmen baılanysty shekteýler joq ekenin aıtty.

— Zańnyń aıasynda shekteý joq. Biraq endaýment qurýǵa ruqsat beretin basym baǵyttardyń ishinde tildi damytý máselesi joq. Tildi ǵylymı zertteý turǵysynan ǵana qarastyrýǵa ruqsat etilgen. Tildi damytý basym baǵyt retinde belgilenbegen, — dedi Saıasat Nurbek.

Aıta keteıik, búgin Májilis endaýment qor týraly zań jobasyn maquldady.