Endi jetimder men qamqorshysyz balalardy kásibı otbasylar tárbıeleıdi

ASTANA. KAZINFORM — Erteńnen bastap «Balany qabyldaıtyn kásibı otbasylar týraly» ereje kúshine enedi. Jańa zańǵa sáıkes, endi jetim nemese qamqorshysyz qalǵan balalar birden jetimder úıine jiberilmeı, kásibı qabyldaýshy otbasylarǵa ornalastyrylady.

Oqý-aǵartý mınıstrliginiń málimetinshe, elimizde 20 myńnan astam jetim jáne ata-anasynyń qamqorlyǵynsyz qalǵan bala bar. Olardyń 15 400-i túrli otbasylarda tárbıelenip jatyr. Qazirgi ýaqytta shamamen 1500 bala patronattyq tárbıede bolsa, 280-ge jýyq bala qabyldaýshy otbasylardyń qaraýynda. Al bilim, medıtsına jáne áleýmettik qorǵaý salasyndaǵy mekemelerde 3 myńnan astam bala ósip keledi.

1 shildeden bastap jetim balalardy tárbıeleýdiń osy tórt balamaly nysanyna jańa úlgi — kásibı qabyldaýshy otbasy júıesi qosylady. Bul ınstıtýtty engizýge qatysty zańǵa byltyr 29 jeltoqsanda Memleket basshysy qol qoıǵan bolatyn. Al sol zańnyń negizinde 2025 jyldyń 31 naýryzynda «Balany qabyldaıtyn kásibı otbasylar týraly ereje» resmı túrde bekitildi.

— Bul zań normasy Qazaqstandaǵy jetim balalardy tárbıeleıtin memlekettik mekemelerdi jabý, balalardyń quqyqtyq múddesin qorǵaý jáne olardyń qandaı da bir psıhologııalyq soqqy almaýyn qadaǵalaý maqsatynda engizildi. Túri jaǵdaılarmen ata-anasynan jetim qalyp nemese qamqorshysynan aıyrylǵan bala birden mekemege jiberilmeı, aldymen kásibı qabyldaýshy otbasyǵa ornalastyrylady, — deıdi Oqý-aǵartý mınıstrligi Balalardyń quqyqtaryn qorǵaý komıtetiniń bas sarapshysy Maqsat Nesipbaev Kazinform tilshisine bergen suhbatynda.

Kásibı negizde bala tárbıeleıtin otbasylarmen arnaıy kelisimshart jasalyp, aı saıyn 275 myń teńge jalaqy tólenedi.

— Qamqorshylyqta, patronattyq tárbıede nemese qabyldaýshy otbasynda tárbıelenip jatqan balalarǵa baılanysty memleket tarapynan qoldaý kórsetiledi. Mundaı otbasylarǵa aı saıyn 10 aılyq eseptik kórsetkish (AEK) mólsherinde járdemaqy tólenedi. Bul — balanyń qajettilikterin óteýge arnalǵan áleýmettik kómek. Al patronat tárbıeshilerge osy járdemaqymen qatar, olardyń eńbegi úshin aı saıyn 35 AEK mólsherinde jalaqy tólenedi. Bul soma tárbıeshi retinde atqaratyn qyzmeti úshin beriledi. Sol sııaqty, kásibı qabyldaýshy otbasylarǵa da ár balaǵa 10 AEK kóleminde járdemaqy taǵaıyndalady. Buǵan qosa, kásibı qabyldaýshy otbasy retinde arnaıy daıyndyqtan ótken erli-zaıyptylarǵa memleket 70 AEK mólsherinde aı saıyn jalaqy tóleıdi, — deıdi Maqsat Nesipbaev.

Kásibı qabyldaýshy otbasy retinde bala tárbıeleý quqyǵyna ıe bolý úshin erli-zaıyptylar Oqý-aǵartý mınıstrliginiń arnaıy úsh aılyq psıhologııalyq daıarlyq kýrsynan ótýi qajet.

— Kásibı qabyldaýshy otbasylardy iriktep alǵan kezde birinshi kezekte jas ereksheligine mán beremiz. Onyń sottylyǵy bolmaýy, arnaıy esepte turmaýy kerek. Densaýlyǵynda eshqandaı kinárát bolmaýy qajet. Sonymen qatar sot sheshimimen áreketke qabiletsiz dep tanylmaýy shart. Oqý-aǵartý mınıstrliginiń ata-analardy daıyndaıtyn 3 aılyq psıhologııalyq kýrsynan mindetti túrde ótýi kerek. Mundaı kezde otbasydaǵy bala sany da eskeriledi. 4 balasy bolsa, ondaı otbasy kásibı qabyldaýshy otbasy bolyp sanalmaıdy. 3 balasy bolsa, tek 1 bala ala alady, — deıdi Balalardyń quqyqtaryn qorǵaý komıtetiniń bas sarapshysy.

Eske sala keteıik, birer kún buryn Jambyl oblysynda 7 jetim bala baspanaly boldy.