Endi turǵyndarǵa esep usynbaǵan múlikti basqarý sýbektileri aıyppul tóleıdi
ASTANA. KAZINFORM — Májilis «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
— Zań jobasy turǵyn úı-kommýnaldyq sharýashylyq salasyndaǵy qoldanystaǵy zańnamany jetildirýge baǵyttalǵan. Zań jobalarynda páter ıeleri kooperatıvteriniń (PIK) quqyqtary, mindetteri belgilengen, olar úshin jalpy jınalystyń sheshimi kóppáterli turǵyn úılerge qyzmet kórsetý negizi. Sonymen qatar ashyqtyqty arttyrý úshin zań jobalary basqarý sýbektileriniń aqparattyq júıelerde qarajattyń jumsalýy men jınaqtalýy týraly aı saıynǵy eseptilikti mindetti túrde ornalastyrý bóliginde ózgerister usynylǵan, — dedi Májilis depýtaty Nurtaı Sabılıanov.
Halyq qalaýlysynyń málimdeýinshe, turǵyn úı ınspektsııasynyń ókilettigi keńeıtiledi.
— Sondaı-aq, ilespe zańda múlik obektilerin basqarý sýbektilerine salyq salý tártibi aıqyndalǵan jáne shottardy ashý merzimin buzǵany jáne esep pen qujattamany usynbaǵany úshin ákimshilik jaýapkershilik belgilengen (50 AEK). Osyǵan baılanysty zań jobasyn birinshi oqylymda qoldaýlaryńyzdy suraımyn. Jumys toby zań jobasyn ekinshi oqylymǵa daıyndaý aıasynda jumysyn jalǵastyrady, — deıdi ol.
Buǵan deıin páter ıeleri kooperatıvteriniń qyzmetine jańa talaptar qoıylatyny týraly habarlaǵan edik.