Endi shetelge jumysqa jiberetin agenttikterden lıtsenzııa talap etiledi
ASTANA. KAZINFORM –Qazaqstandyqtardy shetelge jumysqa ornalastyrýmen aınalysatyn jeke kompanııalarǵa jaýapkershilik kúsheıedi. Bul mindetti Úkimet basshysy Oljas Bektenov júktedi.
— Azamattarymyzdy shetelde jumysqa ornalastyrýmen aınalysatyn jeke agenttikterdiń qyzmetine muqııat nazar aýdarý qajet. Olar eshqandaı jaýapkershilik almaıdy jáne qazir olar baqylaýdan da tys qalyp otyr. Jyl sońyna deıin jeke jumyspen qamtý agenttikteriniń qyzmetin lıtsenzııalaý bóliginde tıisti zańnamalyq ózgerister ázirlenýi qajet, — dedi Oljas Bektenov Úkimet otyrysynda.
Buǵan deıin Premer-mınıstr kóshi-qon salasyna taldaý jasaý qajettigin aıtqan edi.
Eske salsaq, jyl basynda elimizde demografııa jáne kóshi-qon salasyn retteıtin memlekettik organ qurý usynyldy.
Sondaı-aq bıyl 1 mln-ǵa jýyq shetel azamaty Qazaqstanǵa kelýge ótinish bergen.