Endi Ózbekstanda jalǵan oqytýshylar men dáriskerlerge aıyppul salynady

TAShKENT. KAZINFORM – Ózbekstandyq senatorlar jalǵan oqytýshylar jáne dáriskerlermen kúresti kúsheıtýge baǵyttalǵan zańdy maquldady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Olıı Majlısiniń baspasóz qyzmetinen málim etkendeı, qazir jastardyń sanasy men mádenıetine teris áser etetin ıdeıalardy nasıhattaý arqyly aǵartýshylyq qyzmetpen aınalysyp júrgenderdiń sany artty. Bul óz kezeginde zańnamany jetildirýdi talap etedi.

Osyǵan baılanysty «Bilim týraly» zańyna tolyqtyrý engizilip, Ákimshilik kodekspen jaýapkershilik belgilenedi.

Atap aıtqanda, aǵartýshylyq qyzmetpen aınalysýǵa quqyǵy joq adam zańdy elemesten sol baǵyttaǵy jumysyn jalǵastyrsa, onda jeke tulǵaǵa 5-ten 10 bazalyq eseptik shamaǵa deıin (64 myń teńgeden 129 myń teńgege deıin) aıyppul salynady.

Al osyndaı áreketke barǵan laýazymdy tulǵalar 10-nan 15 bazalyq eseptik shamǵa (129 myń teńgeden 193 myń teńgege deıin) deıin aıyppul arqalaıdy.

Eger ákimshilik jaza qoldanylyp, keıin quqyq buzýshylyq qaıtalanatyn bolsa, onda jeke tulǵalarǵa – 10-15, al laýazymdy tulǵalarǵa 15-20 bazalyq eseptik shamaǵa deıin aıyppul salynady.