Endi beıresmı bilim de resmı dep tanylady
ASTANA. KAZINFORM — Qazaqstanda formaldy bilim berý baǵdarlamalarynan tys alynǵan biliktilik resmı túrde tanylatyn boldy, dep habarlaıdy Eńbek jáne halyqty áleýmettik qorǵaý mınıstrligi.
Kásibı biliktilikter jónindegi ulttyq keńes sarapshylar qaýymdastyǵymen birlese otyryp, jańa Ulttyq biliktilik sheńberin (budan ári — UBSh) bekitti. Endi bul qujat tek resmı bilim berýdi ǵana emes, beıresmı jáne aqparattyq oqytý nátıjeleri men tanylǵan biliktilikterdi de qamtıdy.
UBSh — eńbek naryǵynyń barlyq qatysýshysyna arnalǵan: memlekettik organdarǵa, jumys berýshilerge, salalyq qaýymdastyqtarǵa, kásipodaqtarǵa, bilim berý uıymdary men azamattardyń ózderine.
UBSh — biliktilik salalyq sheńberleri men kásibı standarttaryn ázirleýge arnalǵan negizgi qural. Ol biliktilikterdi taný júıesin retteýge múmkindik berip, kásibı ári mansaptyq ósýdiń alǵysharttaryn jasaıdy.
Burynǵy nusqa kóbine resmı bilim berý deńgeılerine súıenip, oqytýdyń basqa túrlerin eskermegen edi. Jańa redaktsııa Eýropalyq biliktilik sheńberiniń qaǵıdattaryna jáne qazirgi ekonomıkanyń talaptaryna negizdelgen.
— Jańartylǵan UBSh Qazaqstannyń eńbek jáne bilim berý zańnamasyna sáıkes ázirlenip, halyqaralyq tájirıbeler eskerildi. Ol ashyqtyq pen salystyrmalylyq qaǵıdattaryna negizdelgen, bul ártúrli salada alynǵan quzyretterdi moıyndaýdy qamtamasyz etip, jumyskerlerdiń mobıldigin jeńildetedi. Jańa UBSh ıkemdi biliktilik júıesin qalyptastyryp, «ómir boıy bilim alý» qaǵıdatyn qoldaıdy jáne ekonomıkanyń naqty qajettilikterine baǵyttalǵan, — dedi QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev.
Jańa redaktsııada eńbek fýnktsııalarynyń kúrdeliligi, jaýapkershilik deńgeıi jáne ǵylymǵa negizdelý dárejesine qaraı júıelengen segiz deńgeı qarastyrylǵan. Bul jumyskerdiń biliktiligin obektıvti baǵalaýǵa jáne ony alýdyń ártúrli joldaryn eskerýge múmkindik beredi.
Osylaısha, quzyretterdiń resmı dáleli retinde endi tek dıplom men jumys ótili ǵana emes, qysqa merzimdi kýrstardy aıaqtaý týraly sertıfıkattar men Career Enbek portalyndaǵy biliktilikti rastaý da moıyndalady.
Osydan buryn QR Eńbek jáne halyqty áleýmettik qorǵaý mınıstrligi ataýly áleýmettik kómekti (AÁK) proaktıvti túrde taǵaıyndaý kezinde jasandy ıntellekt tehnologııalaryn qoldanýdy josparlap otyrǵanyn jazǵan edik.