«Eńbek joly» baıqaýy: 1,2 myńnan astam jas maman daıyndaldy
ASTANA. KAZINFORM — «Eńbek joly» respýblıkalyq konkýrsynyń óńirlik kezeńiniń «Jumys isteıtin jastardyń úzdik tálimgeri» nomınatsııasy boıynsha jeńimpaz atanǵan 20 maman ózi eńbek etken jyldarda 1253 jas mamanǵa tálim berip, túrli salada óz bilimderi men tájirıbelerin tabystady. Bul týraly Eńbek jáne halyqty áleýmettik qorǵaý mınıstrligi málim etti.
Eń kóp shákirt tárbıelegen tálimger – Almaty qalasynan Alshyn Altybaev. Aýyl sharýashylyǵyn mehanıkalandyrý jáne tsıfrlyq transformatsııalaý salasynda 50 jyl boıy eńbek etip, 500-den astam jańa qyzmetkerdi oqytqan. Onyń kásibı biliktiligi men abyroıy kásiporynda joǵary baǵalanady.
Qostanaı oblysynan elektr jabdyqtaryn jóndeý jáne qyzmet kórsetý jónindegi 5-razrıadty elektromonter Rıshat Fasthýtdınov pen Qyzylorda oblysynan kúrish ósirý brıgadasynyń jetekshisi Gúlsim Darıbaeva 100-den astam mamanǵa bilim berdi.
Abaı oblysynan Nurlan Baıbýtınov, Aqtóbe oblysynan Aıdyn Qaıyrbekov jáne Qaraǵandy oblysynan Erlan Syzdyqov taý-ken jáne metallýrgııa salasynda kásibı tájirıbelerimen bólisip, tálimgerlik jyldarynda olar barlyǵy 73 jańa mamandy daıyndady.
Bilim berý salasynda Almaty oblysynan Janat Kerimbaev, Jambyl oblysynan Ulmeken Ibraeva jáne Jetisý oblysynan Raýshan Zaıtbekova 98 mamanǵa tálimgerlik jasady.
Batys Qazaqstan oblysynan Qoblan Metekesov pen Ulytaý oblysynan Dýlat Qurmanbekov telekommýnıkatsııa salasynda 32 mamandy oqytyp shyǵardy.
Ónerkásip salasynda Pavlodar oblysynan Jeksen Ajmanov, Soltústik Qazaqstan oblysynan Asyltas Qabosheva, Shymkent qalasynan Aleksandr Chernyh ózderiniń kásibı tájirıbesimen bólisip, 70 qyzmetkerdi oqytty.
Energetıka salasynda Shyǵys Qazaqstan oblysynan Andreı Lısıtsyn men Astana qalasynan Dısembaı Shaıkenov 55 mamandy oqytyp, jumysqa beıimdedi.
Sonymen qatar, HR salasynda Aqmola oblysynan Nesibeldi Júsipova, Mańǵystaý oblysynan Alekseı Savın jáne Atyraý oblysynan Meıramgúl Jolaeva 104 mamanmen tájirıbe bólisti.
Eske sala keteıik, «Eńbek joly» baıqaýy ónimdi eńbekti yntalandyrýǵa, jastar arasynda jumysshy kásipterin nasıhattaýǵa jáne eńbek áýletteriniń kópjyldyq dástúrlerin nyǵaıtýǵa baǵyttalǵan.
Baıqaý jyl saıyn eki kezeńde – óńirlik jáne respýblıkalyq deńgeıde úsh nomınatsııa boıynsha ótkiziledi: «Úzdik eńbek áýletteri» – eń kóp múshesi bar, eń uzaq jalpy eńbek ótiline ıe, marapattary eń kóp eńbek áýleti tańdalady; «Jumysshy jastardyń úzdik tálimgeri» – baıqaýǵa qujat tapsyrǵan sátte keminde 20 jyl jumys ótili bar, eń myqty degen tálimgerler irikteledi; «Óndiristiń úzdik jas qyzmetkeri» – eńbek ótili 5 jyldan aspaıtyn, óndiriste belsendi jáne eńbekqor jas maman tańdalady.
– Baıqaýdyń óńirlik kezeńi bıylǵy jyldyń shilde aıynda aıaqtaldy. Bıyl jergilikti atqarýshy organdardan baıqaýǵa qatysý úshin respýblıkalyq mańyzy bar 3 qala men 17 oblystan barlyǵy 505 ótinim qabyldandy. Úsh nomınatsııanyń árqaısysy boıynsha 60 jeńimpaz anyqtalyp, olar respýblıkalyq kezeńde óz óńirleriniń namysyn qorǵaıdy, – dep jazdy vedomstvodan.
Baıqaý jeńimpazdaryn QR Eńbek jáne halyqty áleýmettik qorǵaý mınıstrligi janyndaǵy respýblıkalyq komıssııa anyqtaıdy. Komıssııa quramyna vedomstvo ókilderi, QR Parlamentiniń depýtattary, áleýmettik áriptester, «Qazaqstannyń et-sút odaǵy» ZTB jáne Qazaqstan qurylysshylar qaýymdastyǵynyń ókilderi kiredi.
«Eńbek joly» baıqaýynyń jeńimpazdaryn marapattaý saltanaty Jumysshy kásipter jylynyń jabylýyna arnalǵan is-shara aıasynda bıylǵy jeltoqsan aıynda ótkiziledi.
Buǵan deıin habarlanǵandaı, Enbek.kz portalynda jasandy ıntellekt 50 myńnan astam bos jumys ornyn usyndy.