Eńbek ónimdiligin arttyrý shyǵynynyń 40% -yn memleket óteıdi

NUR-SULTAN. QazAqparat – Jyl basynan beri QazIndustry eńbek ónimdiligin arttyrǵan 16 kásiporynǵa 92,4 mln teńgege ótegen. «QazIndustry» qazaqstandyq ındýstrııa jáne eksport ortalyǵy» AQ basqarma tóraǵasy Berik Bekenov osylaı aıtty, dep habarlaıdy QazAqparat tilshisi.

«Búgingi tańda QazIndustry usynatyn eńbek ónimdiligin arttyrý jáne taýarlardy, jumystar men qyzmetterdi ishki naryqta ilgeriletý boıynsha memlekettik yntalandyrý sharalaryn bıznestiń barlyq sanattary da ala alady. ıAǵnı shaǵyn, orta jáne iri dep bólektemeımiz. Kásiporyndar atalǵan maqsattarǵa jumsaǵan shyǵynnyń 40% -na deıin óteımiz. Mysal keltirsek, «AlumConstruction» JShS áınekti qaıta óńdeý kólemin 2 esege arttyrǵany úshin osyndaı ótem tólendi», - dedi QazIndustry basshysy ortalyq kommýnıkatsııalar qyzmetinde ótken brıfıngide.

Sondaı-aq, «Karlskrona LC AB» JShS-ne sheteldik mamandy tartý shyǵyndarynyń bir bóligi tólengen. Sonyń arqasynda óndiristik protsesteri ońtaılandyrylyp, jańa sorǵy jabdyqtarynyń jelisi ıgerilgen.

«Budan bylaı otandyq óndirýshilerde eldiń kez kelgen núktesinen shyǵyndardy óteý týraly elektrondyq ótinim berý múmkindigi bar. Buryn olar qaǵaz júzinde jiberýge jáne sáıkesinshe poshta shyǵyndaryn tóleýge májbúr boldy. Sonymen qatar, QazIndustry usynǵan qoldaý sharalary memlekettik qyzmetter sanatyna aýystyryldy. Búgingi kúni kásiporyndar eGov elektrondyq úkimet portaly arqyly ótinim bere alady», - dep tolyqtyrdy Berik Bekenov.

Kompanııa ókili 2021 jyldyń birinshi toqsanynda QazIndustry mekemesine eńbek ónimdiligin arttyrý boıynsha shyǵyndardyń bir bóligin óteýge 104 ótinim kelip túskenin aıtady. Ázirge sonyń 16-sy maquldanyp, jalpy somasy 92,4 mln teńgege shyǵyndar ótelgen. Qujat qabyldaý áli jalǵasyp jatyr.