Eńbek naryǵyn damytýdyń keshendi josparyn ázirleý aıaqtalýǵa jaqyn – Tamara Dúısenova

ASTANA. QazAqparat – Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova proaktıvti formatta qyzmet kórsetýge qatysty túsinik berdi, dep habarlaıdy QazAqparat tilshisi.

«Osy tapsyrmany oryndaý úshin áleýmettik-eńbek salasyn tsıfrlandyrýdy tereńdetý jónindegi jumys jalǵasady. Onyń basty mindeti – áleýmettik táýekelderdiń aldyn alý jáne proaktıvtik qyzmet kórsetý. Sol úshin bıyl Otbasynyń tsıfrlyq kartasy engizildi. Birinshi toqsanda azamattarǵa áleýmettik tólemderdiń qandaı da bir túrin alý quqyǵy týraly 59 myńnan astam SMS-habarlama jiberildi. Búgingi tańda ortalyq memlekettik organdar men jergilikti atqarýshy organdar kartanyń derekterin qaıta qaraý, otbasylardyń mártebesin naqtylaý jáne muqtaj otbasylarǵa memlekettik qoldaý kórsetý úshin jedel sharalar qabyldaý maqsatynda tıisti jumysty bastady», - dedi T. Dúısenova Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Onyń aıtýynsha, kórsetiletin memlekettik qyzmetterdi keńinen taratý maqsatynda:

usynylatyn taýarlar men qyzmetterdiń sapasyn arttyrý úshin Áleýmettik qyzmetter portalyn,

onlaın eńbek sharttaryn jasasý úshin Elektrondyq eńbek bırjasyn,

elimizge kelip ketetin azamattardyń barlyq sanattaryn esepke alýdy jáne monıtorıngti kózdeıtin kóshi-qon aǵyndarynynyń biryńǵaı esepke alý júıesin,

múgedektikti proaktıvti túrde belgileý úshin biryńǵaı tereze júıesin damytý qarastyrylǵan.

Sonymen qatar ol eńbek naryǵyn damytý máselesine toqtaldy.

«Mınıstrlik Memleket basshysynyń Joldaýynda aıtqan tapsyrmasyn oryndaý úshin Dúnıejúzilik bankpen birlesip, 2030 jylǵa deıin Eńbek naryǵyn damytýdyń keshendi josparyn ázirleýdi aıaqtap qaldy.

Jospardyń basty maqsaty- azamattardy sapaly jumys oryndarymen qamtamasyz etý. Halyqaralyq praktıkada sapaly jumys oryn dep keminde óńirdegi ortasha jalaqy mólsherinde eńbekaqy tólenetin, áleýmettik kepildikteri bar, qaýipsiz, sapaly ári turaqty jumys oryndaryn aıtady. Osyǵan oraı jumyspen qamtý isiniń zańnamalyq negizin damytyp, osy saladaǵy kedergiler men óńirdegi teńsizdikter máselesin sheshý úshin naqty sharalar usynylady», - dedi T. Dúısenova.