Eńbek naryǵyn boljaýdyń ulttyq júıesi qurylmaq

ASTANA. QazAqparat – Eńbek jáne halyqty áleýmettik qorǵaý mınıstrligi eńbek resýrstaryn boljaýdyń ulttyq júıesin qurýdy usyndy. Bul bastama ashyq talqyǵa shyǵarylǵan vedomstvo basshysynyń buıryǵynda kórsetilgen, dep habarlaıdy QazAqparat tilshisi.

Buıryq jobasyna sáıkes, eńbek resýrstarynyń boljamyn halyqty jumyspen qamtý máseleleri jónindegi ýákiletti organ ázirleıdi. Ol úshin mamandandyrylǵan statıstıkalyq baǵdarlama qoldanylady. Baǵdarlama kómegimen naryqtyq jaǵdaılarǵa taldaý júrgizilip, eńbek resýrstarynyń boljamy jasalady.

Qujatta kórsetilgendeı, eńbek narǵyndaǵy boljamdar myna merzimderge jasalady:

- qysqa merzimdi boljaý kezeńi – 1 jyl;

- orta merzimdi boljaý kezeńi – 6 jyl;

- uzaq merzimdi boljaý kezeńi – 2050 jylǵa deıin.

«Qysqa merzimdi kezeńge arnalǵan eńbek resýrstarynyń boljamy jyl saıyn ázirlenedi jáne tórt toqsan kezeńin qamtıdy. Orta merzimdi kezeńge arnalǵan eńbek resýrstarynyń boljamy jyl saıynǵy negizde daıyndalady. Uzaq merzimdi kezeńge arnalǵan eńbek resýrstarynyń boljamy (demografııa boljamy) jyl saıyn ázirlenedi jáne 2050 jylǵa deıingi aralyqty qamtıdy», - dep jazylǵan buıryqta.

Taldaý jumystaryna elimizdiń barlyq óńiri enedi. Onyń nátıjesinde naqty qalalar men aımaqtarda aldaǵy ýaqytta bolýy múmkin maman tapshylyǵy, bos jumys oryndarynyń esebi daıyndalmaq. Mınıstrlik málimetinshe, bul aqparattar «Elektrondyq eńbek bırjasy» memlekettik aqparat portalynda jarııalanady. Bul óz kezeginde túlekterge bolashaq mamandyqty tańdaý kezinde suranystaǵy salalarǵa basymdyq berýine jol ashady.

Buıryq jobasyn ashyq talqylaý 14 jeltoqsanǵa deıin jalǵasady.