Eńbek qaýipsizdigi talaptaryn saqtamaǵan kompanııalarǵa 254 mln teńge aıyppul salyndy
Ortalyq kommýnıkatsııalar qyzmetinde ótken brıfıngide TJM Ónerkásiptik qaýipsizdik komıtetiniń tóraǵasy Nyǵmedjan Maqajanov osylaı málim etti, dep habarlaıdy QazAqparat tilshisi.
«Baqylaý-qadaǵalaý qyzmeti aıasynda avarııalar men oqys oqıǵalardyń aldyn alý maqsatynda 2022 jyly 2 450 tekserý júrgizildi. Onyń ishinde erekshe tártip boıynsha 1 355 tekserý jáne 1 095 jospardan tys tekserý júrgizilip, nátıjesinde 38 277 nysan tekserildi. Tekserý qorytyndysy boıynsha ónerkásiptik qaýipsizdik talaptaryn buzýdyń 34 617 deregi anyqtaldy. 254 mln teńgeden astam somaǵa 1 708 ákimshilik aıyppul salyndy», - dep toqtaldy komıtet tóraǵasy.
Nyǵmedjan Maqajanovtyń aıtýynsha, qaýipsizdik talaptaryn óreskel buzǵany úshin 733 kásiporynnyń jumysy toqtatylǵan.
Brıfıngi barysynda komıtet basshysy ótken jyly el kásiporyndarynda 28 avarııa bolyp, saldarynan 15 adam kóz jumǵanyn málimdedi.
