«Eńbek» baǵdarlamasy: Qostanaıda 700-ge jýyq jumys orny ashyldy

QOSTANAI. QazAqparat – Qostanaı oblysynda «Eńbek» memlekettik baǵdarlamasy sheńberinde 700-ge jýyq jumys orny ashyldy, dep habarlaıdy QazAqparat oblystyq aýyl sharýashylyǵy jáne jer qatynastary basqarmasynyń basshysy Tımýr Bısımbaevqa silteme jasap.

Qostanaı óńirinde aýyldyq eldi mekenderdegi turǵyndardy qoldaýǵa erekshe mán berildi. Oǵan óńirlerdegi memlekettik baǵdarlamalardyń oryndalýy dálel.

Bıyl «Eńbek» baǵdarlamasy boıynsha 540 shaǵyn jáne orta bıznes sýbektisine 2,1 mlrd teńge shaǵyn nesıe berildi. Nátıjesinde 691 jańa jumys orny quryldy.

«Qazirgi ýaqytta QR Aýyl sharýashylyǵy mınıstrligi salalyq odaqtarmen jáne agrobıznes ókilderimen birlesip, AÓK damytýdyń 2022-2026 jyldarǵa arnalǵan jańa tujyrymdamasyn ázirleýde. Onyń negizgi mindeti – Memleket basshysynyń eńbek ónimdiligin 2,5 esege jáne óńdelgen ónim eksportyn 2 esege arttyrý jónindegi tapsyrmasyn oryndaý. Qostanaı oblysy da bul tapsyrmalardy oryndaýǵa daıyn. Aldyn ala jospar qurylyp, ár aýdan-qala AÓK-ti damytý baǵdarlamasynyń iske asyrylýyna jaýapty bolady. Qazirdiń ózinde aımaqta 308 startap joba bar. Olardyń aýqymdylary iriktelip, keshendi jobalar tizimine enedi», - deıdi aýyl sharýashylyǵy jáne jer qatynastary basqarmasynyń basshysy Tımýr Bısımbaev.

Budan bólek, aýyl sharýashylyǵy basqarmasy aýdan ákimdikterimen birlesip, 2021 jylǵy egis alqaptaryn ártaraptandyrý boıynsha jumys júrgizýde.

Atap aıtqanda, oblys sharýalary qaraqumyq, kúnbaǵys maıy, kartop jáne kókónister ósirý úshin arnaıy alqaptarǵa ıe bolady.

Alańdardy bólýdi aýyl sharýashylyǵy basqarmasy iske asyrady.