Eń tómengi jalaqyny ósirýge jyl saıyn 96,3 mlrd teńge jumsalady
QR Ulttyq ekonomıka mınıstri Tımýr Súleımenov vedomstvoda Joldaýda aıtylǵan mindetterdi oryndaýǵa qajetti, ony is júzinde júzege asyrýdyń, qarjylyq qamtamasyz etýdiń tetikteri jáne zańnamalyq sharalarǵa qatysty naqty jospary bar ekenin atap ótti. Soǵan oraı, Memleket basshysynyń Joldaýyn iske asyrý jónindegi jalpyulttyq jospardy ázirleý jumystary bastaldy.
Al Qarjy mınıstri Álıhan Smaıylov bilim berý men densaýlyq saqtaý salalaryn osy salalarda shyǵyndardyń tıimdiligin arttyrýǵa basa kóńil bóle otyryp, memlekettik qoldaýdy keńeıtý boıynsha jumystar jalǵasatynyn aıtty.
Bes jyl ishinde barlyq qarjy kózderinen bilim berý men densaýlyq saqtaýǵa shyǵyndardy JІÓ-nen 7,4-ten 10 paıyzǵa deıin arttyrý mindeti júkteldi. Eń tómengi jalaqy kólemin ósirýdi iske asyrýǵa jyl saıyn 96,3 mlrd teńge baǵyttalatyn bolady. Onyń ishinde 85,8 mlrd teńge tikeleı 275 myń azamattyq qyzmetkerdiń jalaqysyn kóterýge jumsalady. Al 10,4 mlrd teńgesi - salyqtyq shegerýlerdiń artýyna baılanysty óńirlerdiń tabys bóliginiń shyǵyndarynyń ornyn toltyrýǵa baǵyttalady. Olar JAO-ǵa maqsatty transfertter túrinde jetkiziledi.
Nátıjesinde, jalpy ekonomıka boıynsha jalaqyny ósirýmen 1,3 mln adam qamtylady. Óńdeý ónerkásibi men eksportty qosymsha qarjylandyrý 500 mlrd teńge kóleminde iske asyrylady. ShOB-ty damytýdy memlekettik qarjylyq qoldaýdyń jalpy kólemi 2019-2021 jyldary 206,4 mlrd teńgeni quraıdy.
«Úsh jyldyq bıýdjet aıasynda bilimge jumsalatyn shyǵyndardy bıyl 456,3 mlrd teńgeden 2021 jyly 752,1 mlrd teńgege deıin nemese 65 paıyzǵa arttyrý josparlanyp otyr. Osy kezeńde densaýlyq saqtaýǵa jumsalatyn shyǵyndardy 24 paıyzǵa, 1076,2 mlrd teńgeden 1339,1 mlrd teńgege deıin ósirý kózdelgen», - dedi Á. Smaıylov.
