Eń tómengi jalaqyny kóterý: Úkimette kórsetkishter pysyqtalyp jatyr
ASTANA.KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Qazaqstanda eń tómengi jalaqyny 150 myń teńgege deıin jetkizý máselesine túsinik berdi.
Ol búgin Úkimette ótken baspasóz máslıhatynda atalǵan bastama qazir pysyqtalyp jatqanyn aıtty. Eń tómengi jalaqyny aıqyndaý kezinde birqatar ekonomıkalyq faktor, sonyń ishinde eńbek ónimdiligi men medıandy jalaqy deńgeıi eskeriledi.
S. Jumanǵarınniń sózine qaraǵanda, eń tómengi jalaqyny kóterý týraly túpkilikti sheshim memlekettik bıýdjettiń múmkindigine baılanysty qabyldanady.
— Eń tómengi jalaqyny qaı deńgeıge kóteretinimiz nemese ony kóterý múmkindigi bıýdjet múmkindigine qaraı eskeriledi, -dedi Úkimet basshysynyń orynbasary.
Sondyqtan Úkimette eń tómengi jalaqynyń ósýi múmkindiginiń parametrlerine taldaý jasaý jalǵasap jatyr.
Eske salsaq, jaqynda Ulttyq ekonomıka mınıstriniń birinshi orynbasary Azamat Ámrın Úkimettiń aldynda eń tómengi jalaqyny 150 myń teńgege deıin kóterý mindeti turǵanyn aıtqan bolatyn.
Sonymen qatar Eńbek jáne halyqty áleýmettik qorǵaý mınıstri Asqarbek Ertaev eń tómengi jalaqyny 150 myń teńgege deıin kóterý josparyna qatysty pikir bildirdi.
