Emshek sútiniń jeke banki: elimizde alǵash ret shala týǵan balalarǵa tıimdi joba iske aspaq
ALMATY. KAZINFORM – Almaty qalasynyń Perınatologııa jáne balalar kardıohırýrgııasy ortalyǵynda Qazaqstan Respýblıkasynda alǵash ret jańa joba iske qosyldy. Bul týraly QR Densaýlyq saqtaý mınıstrligi málim etti.
Mańyzdy áleýmettik jobany QR Densaýlyq saqtaý mınıstrligi men AYALA qaıyrymdylyq qory iske asyryp otyr. Tabıǵı tamaqtanýdy tikeleı anasynan ala almaıtyn erekshe medıtsınalyq qajettilikteri bar shala týǵan jáne jańa týǵan nárestelerdiń ómirin saqtaýǵa baǵyttalǵan joba.
— Emshek sútiniń jeke banki — bul qarqyndy terapııany qajet etetin jańa týǵan nárestelerdi qoldaýǵa baǵyttalǵan mańyzdy bastama. Aýrýhana jaǵdaıynda, náreste ártúrli sebeptermen anasynan emshek sútin ala almaǵan kezde (mysaly, qıyn bosaný kezindegi medıtsınalyq kórsetilimderge baılanysty), mundaı bank taptyrmas resýrsqa aınalady. Reanımatsııadaǵy jańa týǵan nárestelerinen májbúrli túrde bólingen analarǵa qoldaý kórsetý óte mańyzdy. Emshek sútin qaýipsiz saýý jáne saqtaý protsesin uıymdastyrý nárestelerdi qunarly tamaqpen qamtamasyz etip qana qoımaıdy, sonymen qatar laktatsııany saqtaýǵa, analardaǵy stresti azaıtýǵa jáne aýyr, qıyn bosanǵannan keıin de balamen baılanysyn nyǵaıtýǵa kómektesedi, — delingen habarlamada.
Emshek sútiniń jeke bankin ashý — neonataldyq qyzmetti jetildirýdegi óte mańyzdy qadam
Emshek sútin saýý meıirgerdiń baqylaýymen mindetti tańbalanýy bar sterıldi jeke ydystarda (saýý kúni men ýaqyty) júzege asyrylady. Jeke jáne klınıkalyq emshek sorǵylaryn paıdalanýǵa ruqsat etiledi. Barlyq is-sharalar sanıtarııalyq-gıgıenalyq normalardy saqtaı otyryp júrgiziledi. Bank sterıldi ydystarǵa jınalǵan jáne emshek sútimen qorektendirý múmkin bolmaǵan kezde balany tamaqtandyrý úshin tómen temperatýrada saqtalatyn saýylǵan sút qory bolyp tabylady.
Munda salqyndatylǵan (4 ± 2 °C temperatýrada saqtalǵan) jáne muzdatylǵan (-18…-20 °C temperatýrada) saýylǵan tabıǵı (shıki) sútti saqtaýǵa bolady.
— Bolashaqta Densaýlyq saqtaý mınıstrligi joǵary qaýipti faktorlary bar júkti áıelder keletin jáne shala týǵan jáne salmaǵy az balalar týatyn eldiń árbir 3-shi deńgeıdegi perınataldyq ortalyǵynda osyndaı bankter ashýdy josparlap otyr. Emshek súti jańa týǵan náresteler úshin ońtaıly qorektendirý retinde tanylady: onyń quramynda balanyń tolyq ósýine, damýyna jáne turaqty ımmýnıtetin qalyptastyrýǵa qajetti qorektik zattar men fermentterdiń tamasha teńdestirilgen kesheni bar. Onyń biregeı quramy ınfektsııalyq aýrýlardan qorǵaýdy qamtamasyz etedi jáne uzaq merzimdi densaýlyqty qalyptastyrýǵa yqpal etedi, — dep habarlady vedomstvodan.
Bul joba DDU bastamasy boıynsha jyl boıy ótkiziletin Densaýlyq kúnine arnalǵan is-sharalar sheńberinde: «Salamatty ómirdiń bastalýy — berekeli bolashaqtyń kepili» uranymen iske asyryldy. Joba sonymen qatar analar men jańa týǵan nárestelerdiń densaýlyǵyn saqtaý jónindegi halyqaralyq aqparattyq naýqannyń bóligi boldy.
Buǵan deıin habarlanǵandaı, SQO-da 23 myńnan astam áıel pregravıdaldy daıyndyqtan ótedi.