Emmanýel Makron Astanaǵa saparlaıdy
«Qazaqstan men Frantsııa arasynda óte jaqsy ózara qarym-qatynas qalyptasqan. Frantsııa bizdiń úlken strategııalyq seriktesimiz ári senimdi dosymyz. Ózińizde biletindeı, Frantsııa bizdiń eń iri ekonomıkalyq seriktestesterimizdiń ondyǵyna kiredi. Dıplomatııalyq qarym-qatynas ornaǵan 26 jyldyń ishinde ózara is-qımyldyń tamasha sáýleti qalyptasqan. Buǵan qosa, aǵymdaǵy jyl Frantsııa men Qazaqstan arasynda strategııalyq seriktestik týraly shartqa qol qoıylýynyń 10 jyldyǵymen de erekshelenedi», - dedi kezdesý barysynda Gúlshara Ábdiqalyqova. 
Memlekettik hatshy eki eldiń Memleket basshylary arasynda da tyǵyz baılanys ornaǵandyǵyn eske salyp ótti.
«Taıaýda Qazaqstan Prezıdenti Nursultan Nazarbaev Frantsııa Prezıdenti Emmanýel Makronmen Belgııada ótken úlken sammıt alańynda kezdesti. Naqty máseleler talqylandy. Frantsııa Prezıdenti kelesi jyly Astanaǵa kelýge nıet tanytyp otyrǵanyn bilemiz. Menińshe, atalǵan sapar bizdiń yntymaqtastyǵymyzǵa qosymsha serpin beredi», - dedi ol. 
Gúlshara Ábdiqalyqova eki eldiń bilim salasyndaǵy yqpaldastyǵy da keńeıip kele jatqanyn aıtty.
QR Prezıdentiniń bastamasymen 2014 jyly Abaı atyndaǵy qazaq ulttyq pedagogıkalyq ýnıversıteti janynan «Sorbonna-Qazaqstan» ınstıtýty ashylǵanyn eske saldy. Osy rette taraptar bilim salasynda bastalǵan bastamalardy odan ary jalǵastyrýǵa ýaǵdalasty.
Kezdesý sońynda QR Memlekettik hatshysy frantsýz Elshisine Qazaqstan-Frantsııa yntymaqtastyǵyn odan ary nyǵaıtý isine mol tabys tiledi.
