Emhanalarda jalǵan qujat toltyrylmas úshin face-id júıesi engiziledi

ASTANA. KAZINFORM - Densaýlyq saqtaý mınıstri Aqmaral Álnazarova «24KZ» elearnasyna bergen suhbatynda densaýlyq saqtaý júıesindegi qyzmetti buramalaýdyń (jalǵan qujat toltyrý) aldyn alý boıynsha qabyldanyp jatqan jańa sharalar týraly baıandady. 

Jalǵan qujattarmen kúrestegi negizgi qural – naýqastarǵa medıtsınalyq qyzmetterdi kórsetý faktisin rastaıtyn Face-ID engizýdi qosa alǵanda basqa da tsıfrlyq tehnologııalar bolmaq. 

Mınıstrlik Astanadaǵy bastapqy medıtsınalyq-sanıtarlyq kómek boıynsha respýblıkalyq emhana bazasynda pılottyq jobany iske qosty. Joba aıasynda naýqastar Face-ID jáne veb-kamera kómegimen jeke basynyń sáıkestigin anyqtaıtyn bolady, bul olarǵa kórsetilgen qyzmet týraly derekterdiń burmalanýyna jol bermeýge septik etedi.

«Osy jyldyń sońyna deıin biz Astanada pılottyq jobany iske asyramyz, al 1 qańtardan bastap ony búkil respýblıka boıynsha aýqymyn keńeıtip taratýdy josparlap otyrmyz. Bul jalǵan qujat toltyrýdy túbirimen joq qylatyn tıimdi qural bolady», - dep atap ótti Aqmaral Álnazarova.

Bıometrııalyq jeke bas sáıkestigin anyqtaý júıesi kórsetilgen qyzmetterdi naqty tirkeýdi qamtamasyz etedi, bul naýqastardyń dárigerge qaralýy týraly jalǵan esep jazýǵa múmkindik bermeıdi, sáıkesinshe bıýdjet qarjysynyń da, saqtandyrylǵan azamattardyń jarnasynyń da maqsatsyz jumsalýynyń aldyn alady.