Eljan Birtanov: Almatydaǵy korporatıvtik basqarý júıesin barlyq óńirlerge engizý kerek
Mınıstrdiń aıtýynsha, Densaýlyq saqtaý mınıstrligi qala, aýdan ortalyqtaryndaǵy bir-birine jaqyn ornalasqan aýrýhanalardy biriktirip, medıtsınalyq mekemelerdi biryńǵaı menedjmentke kóshirýdi josparlap otyr. Máselen, Almaty qalasyndaǵy kópbeıindi balalar aýrýhanasy juqpaly aýrýlar aýrýhanasymen, kardıoortalyq pen jedel medıtsınalyq kómek aýrýhanasy biriktiriledi. Sonda, myqty mamandar bir jerge shoǵyrlanady da, kez-kelgen naýqasqa shuǵyl kómek kórsetiledi, densaýlyq saqtaý salasynda shyǵyn únemdeledi.
- Jansaqtaý, qabyldaý, operatsııa bólimderi bir jerde ornalassa, maman tapshylyǵy bolmaıdy. Bir mezette kóp adamǵa esh qıyndyqsyz kómek kórsetiledi. Qalǵan qyzmet alǵashqy medıtsınalyq sanıtarlyq kómek aıasynda retteledi. 400-500-den asa orny bar aýrýhananyń ǵana jumysy tıimdi sanalady. Sondyqtan, shaǵyn aýrýhanalardan arylýymyz kerek. Qazir Qazaqstandaǵy medıtsınalyq mekemeler ortasha eseppen 140 adamǵa arnalǵan. Árıne, eldi mekenderdegi mekemelerge tıispeımiz. Olardy, kerisinshe, kúrdeli jóndeýden ótkizip, halyqaralyq standartarǵa yńǵaılaý kerek», - dedi Eljan Birtanov.
- Eljan Amantaıuly, óńirlerdi medıtsına salasynda birqatar ózgerister kútip turǵanyn aıtyp jatyrsyz. Al halyq kóp shoǵyrlanǵan Almaty qalasynda medıtsınalyq kómek sapasyn arttyrý baǵytynda qandaı jumystar atqarylady?
- Almaty qalasynda jergilikti, respýblıkalyq bıýdjet esebinen jáne kásipkerlerdiń kómegimen jańa nysandar salynady. Sondaı-aq, memlekettik-jekemenshik áriptestik aıasynda medıtsınalyq mekemelerdi senimdi qolǵa tapsyrý josparlanǵan. Nátıjesinde aýrýhana, emhananyń menedjmenti jaqsaryp, olardy kúrdeli jóndeýden ótkizý úshin ınvestorlar tartýǵa múmkindik týady.
Almaty pılottyq joba retinde medıtsına salasyn sandyq júıege kóshirgen. Bul dárigerlerdiń júgin jeńildetip qana qoımaı, aqparatty saqtaý, medıtsınalyq kómek, medıkamentterdi tirkeýdiń sapasyn arttyryp, ákimshilik qyzmetkerlerdiń sany qysqaratynyn aıta ketý kerek. Al MÁMS júzege assa, shyǵyn taǵy azaıady.
Ózińiz biletindeı, Elbasy bıyl tabysy tómen memlekettik aýrýhana, emhana qyzmetkerleriniń jalaqysyn kóterýdi tapsyrǵan bolatyn. Bul jerde kásipkerler de áleýmettik jaýapkershilikti sezinip, atsalysýy tıis. Al Almatyda jekemenshik klınıkalar kóp. Medıtsınalyq saqtandyrý qory olarmen kelisimge otyrdy. ıAǵnı, klınıkalar MÁMS júıesi aıasynda qoldaý kóredi. Munyń bári halyqqa medıtsına qoljetimdi bolý úshin kerek.
- Almatyda ǵana emes, jalpy elimizde jedel járdem qyzmetiniń jumysyna qatysty ártúrli synı da sypaıy pikirlerdiń aıtylyp jatatyny belgili. Ońtústik astanadaǵy jedel járdem qyzmetiniń sapasyn qalaı kóterýge bolady dep oılaısyz?
- Almatydaǵy jedel medıtsınalyq kómek kórsetetin ortalyqtyń jumysyn baqylap qaıttym. Mekeme halyqaralyq standartqa saı, qabyldaý bólimine túsken naýqastardy birinshi iriktep alyp, sodan keıin emdeıdi. Kásipkerlerdiń kómegimen №2 qalalyq aýrýhana janynan balalarǵa arnalǵan ekinshi jedel járdem kórsetý ortalyǵy ashylǵanyn bilemiz. Onda da qazirgi talapqa saı qabyldaý, joǵary tehnologııaly hırýrgııa bólimderi, operatsııalyq blok bar. Bıznesmenderdiń áleýmettik jaýapkershiliginiń arqasynda, dárigerler qanshama balany der kezinde qarap, aman alyp qalyp jatqanyn aıta ketý kerek.
Jedel shuǵyl medıtsınalyq kómektiń sapasyn arttyrý azamattar úshin óte mańyzdy. Dese de, problema joq emes: Almaty - megapolıs. Qalaǵa aımaqtardan kóship kelgender kóp. Al ózge óńirlerdiń turǵyndary esepke alynbaǵan. Medıtsınalyq saqtandyrý qorynan bul salaǵa jetkilikti qarjy bólinbegen. Biz bul máseleni birlesip sheshýdemiz. Jedel medıtsınalyq járdemniń sapasyn jaqsartý úshin qazynadan qosymsha qarjy bólinedi. Biraq mınıstrliktiń talaptary, halyqaralyq standarttar oryndalýy tıis.
- Korporatıvtik basqarý júıesin engizip jatqan Almatynyń tájirıbesi qanshalyqty jemisin berip jatyr?
- Almaty qalasyndaǵy jedel shuǵyl járdem kórsetý aýrýhanasyn da aralap shyqtym. Bul - tarıhy tereńde jatqan, elimizdegi eski medıtsınalyq mekemeniń biri. Jedel medıtsınalyq kómektiń negizi osynda qalanǵan deýge bolady. Atalǵan aýrýhanada da 3N júıesi engizilgen. Qabyldaý bólimine túsken naýqastar irikteledi.
Almaty naýqastardyń muń-muqtajyn tyńdap, adamdarmen ashyq jumys isteý jaǵynan ózgelerge úlgi. Qalada turǵyndarmen baılanys ornatý úshin arnaıy keńse ashylǵan, onda mamandar kóptiń aryz-shaǵymyn tyńdaıdy. Bul medıtsınalyq kómekti sapaly, qoljetimdi etýge septigin tıgizedi.
Almaty - korporatıvtik basqarý júıesin júzege asyrǵan alǵashqy qalalardyń biri. Shaharda jaqynda ǵana baqylaýshylar keńesi quryldy. Keńestiń quzyry keń. Quramyna kásipkerler, qoǵam belsendileri men BAQ ókilderi kiredi. Ol klınıkalardyń shyǵynyn qadaǵalap, transparentti basqarýǵa múmkindik beredi. Birinshi basshylardy taǵaıyndaǵanda úmitkerlerdi ashyq talqyǵa salǵan da Almaty. Máselen, ortalyq aýrýhananyń bas dárigeriniń ornyna 8 kandıdat ótinish bildirgen. Ádil tańdaý jasaldy. Bul tájirıbeni barlyq óńir paıdalaný kerek. Ortalyq aýrýhana, emhananyń bas dárigerleri halyqqa jaqyn júrýge, qoǵamǵa qyzmet etýge mindetti.
- Suhbat bergenińiz úshin rahmet!