Elshi Cho Engchon qazaq jáne káris bılerinen kóptegen uqsastyq tapty
Mádenı shara aıasynda káris elinen arnaıy kelgen «Gugak» ulttyq ortalyǵynyń ártisteri óz ónerlerin pash etti, dep xabarlaıdy QazAqparat tilshisi.
Ońtústik Koreıanyń Qazaqstandaǵy Tótenshe jáne Ókiletti Elshisi Cho Engchonnyń aıtýynsha, káris xalqy ejelden beri mýzyka men bıge qumar bolǵan. Ony 1700 jyldyq tarıxy bar qujattar da rastap otyr.
"Men ózim - qazaq xalqynyń dástúrli mýzykasyn tyńdap, ulttyq bılerin kórip júrgen adammyn. Sonda baıqaǵanym, qazaq pen káris mýzykasy da, bıi de uqsas bolyp keledi. Osy joly bizben birge Astana qalasynyń "Naz" memlekettik bı teatrynyń ansambli óner kórsetti. Eki eldiń uqsastyǵyn sodan baıqaýǵa bolady", - deıdi elshi.
Káris xalqynyń «Pýchechým» bıi de kórermen qaýymdy beı-jaı qaldyrmady. Qazdaı tizilip shyqqan bıshi qyzdar qolyndaǵy jelpýishterdi birde joǵary, birde tómen túsirip, qutty bir sýret salǵandaı boldy. Al olardyń qımyl qozǵalystary men yrǵaqty mýzyka jınalǵan jurtty tylsym bir álemniń qushaǵyna túsirdi. Sodan bolar, dál osy "Pýchechým" káris xalqynyń tanymal ári ádemi bıleriniń biri bolyp sanalady.
Al álemge áıgili «MB Crew» breık-dans toby men «Kokdýse» dástúrli óner toby «B-boying» jáne «Sachjachým» (Arystan bıi) sııaqty eki bólek zamannyń janryn úndestirip, ázilge toly qımyldarymen xalyqtyń kóńil-kúıin bir kóterip tastady.
Aıta keteıik, Oństústik Koreıanyń mádenı sharalary osymen bitpeıdi. Aldaǵy EKSPO-2017 xalyqaralyq kórmesi aıasynda káristiń tanymal ártisteri óner kórsetedi degen jospar bar.
